எதேச்சாதிகார போக்கில் சிறிலங்கா-நவநீதம் பிள்ளை

இலங்கைத்தீவுக்கான ஐ.நா ஆணையாளர் நவநீதம் பிள்ளை அவர்களது பயணம், சிறிலங்கா தொடர்பிலான அனைத்துலகின் மற்றுமொரு கவனத்தினை குவித்திருந்த நிலையில், எதேச்சாதிகார போக்கில் சிறிலங்கா என ஐ.நா ஆணையாளர் குறித்துரைத்த கருத்து , அனைத்துலக ஊடகங்களின் இன்றைய மையச்செய்திகளில் ஒன்றாகிவிட்டது.
போருக்கு பிந்திய இலங்கைத்தீவின் சூழலில், சிறிலங்கா அரசாங்கத்தின் போக்கு அனைத்துலக மட்டத்தில் கடும் கடுமையான விமர்சனங்களை ஏலவே எதிர்கொண்டு வரும் நிலையில், அனைத்துலக ஊடகங்களில் மற்றுமொரு மையச்செய்தியாக (எதேச்சாதிகார போக்கில் சிறிலங்கா) ஐ.நா ஆணையாளரின் கூற்று வெளிவந்திருப்பமை சிறிலங்காவுக்கு மற்றுமொரு கரும்புள்ளியாகவே கருதப்படுகின்றது.
போர் குற்ற விசாரண, ஆட்கடத்தல்கள், ஊடகத்துறையினர் மீதான தாக்குதல்கள், நில அபகரிப்பு, பாலியல் அச்சுறுத்தல்கள், காணமல் போனோர் விவகாரம், இராணுவ ஆக்கிரமிப்பு, மத வழிபாட்டு உரிமைகளுக்கான அச்சுறுத்தல்கள் என பல்வேறு விவகாரங்களில் சிறிலங்கா அரசினது போக்கும் ,அதன்வழி இலங்கைத்தீவில் மேலெழும் சிங்கள பேரினவாத பூதமும் சிங்களத்தின் மீதான கடும் விமர்சனங்களுக்கு காரணமாகியிருந்தன.
இந்நிலையில் இலங்கைத்தீவுக்கான ஐ.நா ஆணையாளரின் பயணம் சிறிலங்கா தொடர்பிலான அனைத்துலகின் கவனத்தினை பெற்றிருந்தது.
உங்களுடைய அறிக்கை கூட முன்கூட்டியே தீர்மானிக்கப்பட்ட ஒன்றென மக்கள் கருதுகின்றனர் என ஐ.நா ஆணையாளருக்கு தெரிவித்திருந்த சிறிலங்காவின் அரசுத் தலைவர் மகிந்த ராஜபக்ச, அறிக்கையானது சுதந்திரமானதாக இருக்க வேண்டுமென தெரிவித்திருந்தார்.
பல்வேறு விவகாரங்கள் ஐ.நா ஆணையாளரின் பயணத்தினைச் சுற்றி இருந்ததோடு தமிழ்மக்கள் மத்தியில் ஓருவித எதிர்பார்ப்பும் இருந்துள்ளமை இங்கு குறிப்பிடதக்கது.

நீங்களும் காணாமற்போவீர்கள்-மக்களுக்கு மிரட்டல்!

"உங்கள் பிள்ளைகள் காணாமற்போயுள்ளனர் என நவநீதம்பிள்ளையிடம் மனுக் கொடுத்துள்ளீர்கள். இதனால் உங்கள் பிள்ளையின் நிலையே உங்களுக்கும் ஏற்படும்.''இப்படி நேற்று மாலை 6.45 மணியளவில் முள்ளிவாய்க்கால் பகுதியில் வீடொன்றுக்கு மோட்டார் சைக்கிளில் சென்ற இனந்தெரியாத இருவர் அங்கிருந்தவர்களுக்கு எச்சரிக்கை விடுத்துச் சென்றுள்ளனர்.அத்துடன் முள்ளிவாய்க்கால், கேப்பாபிலவு, புதுமாத்தளன் பகுதிகளில் ஐ.நா. மனித உரிமைகள் ஆணையாளர் நவநீதம்பிள்ளைக்கு பிரச்சினைகளை எடுத்துக் கூறிய மக்களின் விவரங்களை திரட்டும் நடவடிக்கையில் புலனாய்வாளர்கள் மும்முரமாக ஈடுபட்டனர் என்றும் குற்றம் சாட்டப்பட்டது. புலனாய்வாளர்களின் இந்த நடவடிக்கை குறித்து அங்கிருந்தவர்களால் உடனடியாக ஐ.நா. மனித உரிமை ஆணையாளரின் கவனத்துக்குக் கொண்டுவரப்பட்டதாகவும் கூறப்பட்டது. நவநீதம்பிள்ளை மக்களுடன் உரையாடிய இடங்களுக்கு சிவில் உடையில் சென்ற புலனாய்வாளர்கள் அவருடன் உரையாடியவர்களின் விவரங்களை பெற்றுக்கொண்டதாகவும் இதனால் அந்தப் பகுதிகளில் அச்சநிலை ஏற்பட்டதாகவும் தெரியவருகிறது. இது குறித்து உடனடியாகவே ஐ.நா. மனித உரிமை ஆணையாளரின் கவனத்துக்கு கொண்டு வரப்பட்டது. அதேவேளை, நேற்று ஆணையாளர் பயணம் செய்த முல்லைத்தீவு, புதுக்குடியிருப்பு வீதிகளில் இராணுவத்தினர் இல்லை. பொலிஸாரே கடமையில் ஈடுபடுத்தப்பட்டிருந்தனர். இராணுவத்தினரில் பெருமளவானோர் சிவில் உடையில் நடமாடினர் என்றும் சில இடங்களில் நவநீதம்பிள்ளையுடன் பேசக்கூடாது என்று மக்கள் மிரட்டப்பட்டனர் என்றும் கூறப்படுகிறது.

அழுது புலம்பிய காணமற்போனோரின் உறவினர்கள்!தடுத்து நிறுத்திய பொலிஸார்!

ஐ.நா மனித உரிமைகள் ஆணையாளர் யாழ்ப்பாணம் சென்றுள்ள நிலையில், காணாமற்போனோரின் உறவுகள் அவரை சந்கிக்கும் நோக்கில் ஒன்று கூடியிருந்தனர்.
யாழ். பொதுநூலக முன்பக்க வாசலில் காணாமற்போனோரின் உறவுகள் சுலோகங்கள் சகிதம் காத்திருந்தனர்.
இந்நிலையில் இன்று காலை 9.30 மணியளவில் யாழ் பொதுநூலகத்தில் வடமாகாண ஆளுநர், அரச அதிபர்கள், மற்றும் மாகாண அதிகாரிகளை சந்தித்து கலந்துரையாடினார்.
இதில் யாழ்ப்பாணம், கிளிநொச்சி மற்றும் முல்லைத்தீவு மாவட்ட செயலாளர்கள் உட்பட அரச பிரதிநிதிகள் பங்கேற்றிருந்தனர்.
அதேவேளை நூலகத்திற்கு முன்பக்கமாக காணாமற்போனோரின் உறவுகள், காணாமல் போனவர்கள் கண்டறியப்பட வேண்டும் நீதியான விசாரணை குழுக்கள் அமைக்கப்பட்டு விசாரணைகள் மேற்கொள்ளப்பட வேண்டும் என கோரி கதறி அழுதனர்.
போரின் பின்னரான அபிவிருத்தி தொடர்பாக ஆணையாளருக்கு, விளக்கம் அளிக்கப்பட்டு கொண்டிருந்தவேளை வெளியே காணாமற்போனோரின் உறவுகள் தம் உறவுகளை தேடித்தருமாறு கதறி அழுது கொண்டு இருந்தனர்.
ஒரு மணி நேரத்திற்கு மேலாக நடைபெற்ற கலந்துரையாடலை முடித்து கொண்டு வெளியேறிய ஐக்கிய நாடுகள் சபையின் மனித உரிமை ஆணையாளர் நவநீதம்பிள்ளையை காணாமற்போனோரின் உறவுகள் சந்திக்க முற்பட்டு, முன்பக்க வாசலை நோக்கி சென்றவேளை, அவர்களை பொலிசார் தடுத்து நிறுத்தினர்.
இதனால் அப்பகுதியில் பதற்றம் நிலவியது. அதனை அடுத்து நவநீதம்பிள்ளை அடங்கிய குழுவினர் பின்பக்க வாசல் வழியாக வெளியேறி சென்று விட்டனர்.
அதேவேளை காணாமற்போனோரின் உறவுகள் 15 பேர் அடங்கிய குழு ஒன்று யாழ். ஐ.நா அலுவகத்தில் நவநீதம்பிள்ளையை சந்தித்து மகஜர் ஒன்றினையும் கையளித்தனர்.

முள்ளிவாய்க்காலில் இருந்து படைகள் ஓட்டம்!

சிறிலங்கா சென்றுள்ள ஐ.நா மனித உரிமை ஆணையாளர் நவநீதம்பிள்ளை, இன்றைய தினம் தமிழர் தாயகப் பகுதிகளுக்கு விஜயம் செய்யவுள்ளார்.
யாழ்ப்பாணம் செல்லும் அவர், குடாநாட்டின் பல்வேறு பகுதிகளுக்கும் சென்று மீளக்குடியமர்த்தப்பட்ட மக்களை சந்திப்பார். பின்னர், அங்கிருந்து கிளிநொச்சிக்குப் புறப்படுவார்.
ஏ9 வீதியால் பயணம் மேற்கொள்ளவுள்ள அவர், போரினால் பாதிக்கப்பட்ட பகுதிகளைச் சேர்ந்த மக்களுடன் பல சந்திப்புகளை மேற்கொள்ளவுள்ளார்.
பாதிக்கப்பட்ட மக்களுக்கான இந்திய வீட்டுத் திட்டம் மற்றும், அதன் முன்னேற்றங்கள் குறித்தும் நவநீதம்பிள்ளை பார்வையிடவுள்ளார்.
இறுதிப்போர் நடந்த புதுமாத்தளன் மற்றும் முள்ளிவாய்க்கால் பகுதிகளையும் நவநீதம்பிள்ளை பார்வையிடவுள்ளார்.
இந்நிலையில் ஆணையாளரின் வருகைக்கு முன்னர் போர் எச்சங்களை அழிக்கும் நடவடிக்கையில் சிறிலங்கா இராணுவத்தினர் தீவிரமாக ஈடுபட்டு வந்தனர்.
போர்த்தடங்களை அழிக்கும் நடவடிக்கையில் ஈடுபட்ட இராணுவத்தினர், நேற்று இரவோடு இரவாக அவ்விடத்தை விட்டு வெளியேறியுள்ளதாக வன்னித் தகவல்கள் தெரிவிக்கின்றன.
அத்துடன் அங்கு இருந்த இராணுவ மினிமுகாம், காவலரண்கள் என்பனவும் அகற்றப்பட்டுள்ளதாக தெரியவருகின்றது.

கொள்ளையர் வடிவில் சென்ற சிங்க படைப்பிரிவு!

ஊடகவியலாளர் மந்தனா இஸ்மையில் அபேவிக்ரம கடத்திச் செல்ல சென்ற ஆயுதம் தாங்கிய குழுவினர் இலங்கை இராணுவத்தின் சிங்க படைப்பிரிவை சேர்ந்த வீரர்கள் என இணைத்தளம் ஒன்று தகவல் வெளியிட்டுள்ளது.
அரசாங்கத்தின் முக்கிய தலைவரின் மகன் ஒருவரே அவர்களை அங்கு அனுப்பி வைப்பதற்கான ஒப்பந்தத்தை வழங்கியதாகவும் அதில் கூறப்பட்டுள்ளது.
பம்பலப்பிட்டி டிக்மன்ஸ் வீதியில் உள்ள ஊடகவியலாளரின் வீட்டிற்கு சென்ற நிலையில் பொலிஸாரின் துப்பாக்கி இலக்காகி கொல்லப்பட்ட நபர் சிங்க படைப்பிரிவை சேர்ந்த கதிரப்புலிகே இந்திக சம்பத் குமார என்ற இராணுவ வீரர் என தெரியவந்துள்ளது.
கைதுசெய்யப்பட்டவர்களில் இலக்கம் 502712, உதசிறி அசங்க என்ற இராணுவ கோப்ரல், இவர் 5வது சிங்க படைப்பிரின் அதியுயர் பாதுகாப்பு வலய பாதுகாப்பு பிரிவில் சேவையாற்றுகிறார்.
இலக்கம் 418908, கதிரப்புலிகே ரெஜின் சந்திமல் குமார சிங்க படைப்பிரிவின் விசேட படைப்பிரிவு அதியுயர் பாதுகாப்பு வலயம் கொழும்பு.
கதிரப்புலிகே ரோஹித்த லக்ஷ்மன் , வித்தான ஆராச்சிகே சந்தகுமார ஆகியோரும் சிங்கப்படைப் பிரிவின் வீரர்கள் என அந்த இணையத்தளம் கூறியுள்ளது.
ஒரு வர்த்தக கொடுக்கல் வாங்கல் விடயத்தில் சம்பந்தப்பட்ட அரசாங்கத்தின் முக்கிய தலைவரின் மகனுக்கு கிடைத்த தரகு பணம் தொடர்பான தகவல்கள் ஊடகவியலாளர் மந்தனாவுக்கு கிடைத்துள்ளது.
இது தொடர்பிலான புலனாய்வு தகவல் சம்பந்தப்பட்ட முக்கிய தலைவரின் மகனுக்கு கிடைத்ததாகவும் இதனையடுத்து அந்த ஆவணங்களை ஊடகவியலாளரிடம் இருந்து கைப்பற்ற அவர் இராணுவத்திற்கு இந்த ஒப்பந்தத்தை வழங்கியதாகவும் தெரியவருகிறது.
இதற்காக பேசப்பட்ட தொகையில் மூன்று லட்சம் ரூபா வழங்கப்பட்டுள்ளதுடன் அதனை அரசாங்கத்தின் முக்கிய தலைவருக்கு நெருக்கமான நாடாளுமன்ற உறுப்பினர் ஒருவரே செலுத்தியுள்ளதாக பேசப்படுகிறது.
ஊடகவியலாளரையோ, அவரது வீட்டில் இருப்பவர்களையோ கொலை செய்யாது, அவரை அச்சுறுத்தி அந்த ஆவணங்களை பெறுமாறு அங்கு அனுப்பி வைக்கப்பட்ட படையினருக்கு ஆலோசனை வழங்கப்பட்டிருந்தாகவும் அந்த இணையத்தளம் மேலும் குறிப்பிட்டுள்ளது.
ஊடகவியலாளரின் வீட்டிற்கு புகுந்து அவரை கொலை செய்ய போவதாக அச்சுறுத்தி ஆவணத்தை பெற்று கொள்ளுமாறு, அது சாத்தியப்படவில்லை என்றால் அவரை கடத்திச் செல்லுமாறு அவர்களுக்கு ஆலோசனை வழங்கப்பட்டிருந்தது.
அதேவேளை மந்தனாவின் வீட்டிற்கு சென்ற இராணுவத்தினர் டிபெண்டர் ரக வாகனத்தில் அழைத்துச் செல்லப்பட்டு, அங்கு இறக்கி விடப்பட்டதாக கூறப்படுகிறது. இதனை முச்சக்கர வண்டி சாரதிகள் சிலர் அவதானித்துள்ளனர் என்றும் அந்த இணையத்தளம் குறிப்பிட்டுள்ளது.

சிவராசாவிற்கு அனந்தி கொடுத்த சாட்டையடி!

தமிழ் விவகாரங்கள் மற்றும் ஜனாதிபதியின் ஊடக இணைப்பாளர் ஆர்.சிவராஜா வெளியிட்ட அறிக்கைக்குப் பதிலளிக்கும் வகையில் தமிழ்த்தேசிய கூட்டமைப்பின் யாழ் மாவட்ட வேட்பாளர் அனந்தி சசிதரன் வெளியிட்டுள்ள ஊடக அறிக்கை
மாவிலாறு அணையை எழிலன்தான் மூடினார். அதுவே இறுதிப்போருக்கு வழி சமைத்தது என்பதற்காக அவரின் மனைவி அனந்தி தமிழ் மக்களிடம் பகிரங்க மன்னிப்பு கோர வேண்டும் என்று தமிழ் விவகாரங்கள் மற்றும் தமிழ் ஊடகங்களுக்கான ஜனாதிபதியின் இணைப்பாளர் ஆர்.சிவராஜா விடுத்துள்ள அறிக்கையில் தெரிவித்திருப்பதன் மூலம் அவர் தன்னுடைய அறியாமையையும் சிறுபிள்ளைத் தன்மையையும் வெளிப்படுத்தியிருக்கின்றார்.
இறுதிப் போரின்போது முள்ளிவாய்க்காலில் இடம்பெற்ற சம்பவங்களின் சாட்சியாக இருப்பவர்கள் ஐநாவின் மனித உரிமை ஆணையாளரைச் சந்திப்பதன் மூலம் உண்மைகள் வெளிப்பட்டுவிடும். அங்கு நடைபெற்ற உரிமை மீறல்கள் நிரூபிக்கப்பட்டுவிடும் என்பதால் அதற்காக அச்சமடைந்து அரசுக்கு வக்காலத்து வாங்குவதற்காகவே சிவராஜா இவ்வாறு அறிக்கை விட்டிருக்கின்றார்.
இறுதிப்போரின் முடிவில் என்னைப் போன்றவர்கள் பொது மன்னிப்பு அளிக்கப்படும் என்ற அரசாங்கத்தின் உறுதி மொழியை நம்பித்தான் எங்களுடைய கணவர்களை இராணுவத்திடம் ஒப்படைத்தோம். அதேபோல எத்தனையோ பெற்றோரும் தமது பிள்ளைகளை ஒப்படைத்தார்கள். அவர்களைப் பொறுப்Nபுற்று கொண்டு சென்ற அரசாங்கம் அவர்கள் பற்றிய தகவல்களை இன்று வரையிலும் தெரிவிக்காமல் கபட நாடகமாடிக் கொண்டிருக்கின்றது. இதன் மூலம் ஒரு நாட்டின் அரசாங்கம் என்ற வகையில் பொறுப்போடு நடந்து கொள்ளத் தவறியிருக்கின்றது. கூலிக்கு மாரடிக்கின்ற சிவாராஜாவுக்கு இதெல்லாம் எப்படி புரியப் போகின்றது?
எழிலன் திருகோணமலை மாவட்டத்தின் அரசியல்துறை பொறுப்பாளராக இருந்தாரே ஒழிய விடுதலைப்புலிகளின் யுத்தத்திற்கு அவர் பொறுப்பாக இருக்கவில்லை. மாவிலாறு சம்பவம் என்பது தமிழ் மக்களின் உரிமைகளை வென்றெடுப்பதற்கான விடுதலைப்புலிகளின் போராட்டத்தில் ஒரு அம்சம் அவ்வளவுதான்.
உண்மையில் மாவிலாறு என்பது ஒரு ஆறு அல்ல. அது ஒரு தண்ணீர் ஓடிக்கொண்டிருக்கும் வாய்க்கால். அது மூடப்பட்டிருந்த காலத்தில் மக்கள் பயன்படுத்தக் கூடிய அளவுக்கு அங்கு தண்ணீரும் இருக்கவில்லை. வற்றிய நிலையில் பெறுமானமற்று அது இருந்தது.
ஆனால் யுத்தத்தை எப்போது ஆரம்பிக்கலாம். தமிழ் மக்களை எப்படி அடக்கி ஒடுக்கி அழிக்கலாம் என காத்திருந்த ஆட்சியாளர்கள் இதைப் பெரிதுபடுத்தி ஒரு சாட்டாக வைத்து தமது நோக்கத்தை நிறைவேற்றினார்களே தவிர வேறு ஒன்றும் இல்லை.
இதைக்கூட அறியாதவராக சிவராஜா சிறுபிள்ளைத் தனமாக அறிக்கை விடுவதும் விமர்சனம் செய்வதும் கேலிக் கூத்தானது.
வெலிவேரியாவில் தொழிற்சாலைக் கழிவுகளினால் நிலத்து நீர் விசமடைந்திருந்ததனால் குடிநீர் கேட்டவர்களை இராணுவத்தை அனுப்பி மூன்று பேரைக் கொன்று அப்பாவிகளை அடக்கி ஒடுக்கிய அரசாங்கத்திற்காக ஜனாதிபதியின் இணைப்பாளர் சிவராஜா வக்காளத்து வாங்கி அறிக்கை விடுவது வேடிக்கையாக இருக்கின்றது.
திருமலை அரசியல் துறைப் பொறுப்பாளராக இருந்த அவரது மனைவியான என்னை தமிழ் மக்களிடம் மன்னிப்புக் கோரச் சொல்வதற்கு ஜனாதிபதியின் தமிழப்பிரிவு இணைப்பாளருக்கு என்ன அருகதை உண்டு? எங்கள் மக்களும் நானும் பட்ட சொல்லொணாத் துயரங்களை இவர் கண்ணால் கூடப் பார்த்திருக்க முடியாது. முள்ளிவாய்க்கால் என்றால் என்ன அங்கு என்ன நடந்தது என்பது பற்றி ஒரு சிறு துளியாவது இவருக்குத் தெரியுமா? அப்படிப்பட்ட இவர் என்னை நீலிக்கண்ணீர் வடிப்பதாகச் சொல்வது நீலிக்கண்ணீருக்கு அர்த்தம் தெரியாத அவருடைய அறியாமையைத்தான் காட்டுகின்றது.
நானா இல்லை ஜனாதிபதியின் தமிழ்ப் பிரிவு ஊடக இணைப்பாளராகிய சிவராஜா எனக்கெதிராக அறிக்கை வெளியிட்டதன் மூலம் அரசுக்காக அவர்தான் நீலிக்கண்ணீர் வடிக்கின்றார் என்பதைத் தமிழ் மக்கள் நன்றாகவே புரிந்துகொள்வார்கள். தேர்தலில் அவர்கள் தகுந்த பதிலும் தருவார்கள். அப்போது எல்லாம் புரியும்.
இலட்சக்கணக்கான மக்களுக்கு உணவு செல்வதைத் தடுத்து நிறுத்திய அரசுடன் ஒட்டிக் கொண்டு தண்ணீர் பற்றிபேசுவது இவருக்கு வெட்கமாக இல்லையா? பாதிப்புகளுக்கு உள்ளாகி நடந்தவற்றுக்காக நியாயம் கேட்கின்ற என்போன்றோருக்கு எதிராக அறிக்கை விடுவது ஊடகத்துறையில் நீண்ட காலம் பணியாற்றியதாகக் கூறப்படுகின்ற சிவராஜாவை ஒரு கருத்துப் பச்சோந்தியாகவே கருத வைக்கின்றது என்பதை அவர் கவனத்தில் எடுப்பது நல்லது.
கடந்த ஜெனிவா மனித உரிமைக் கூட்டத்தொடரில் இலங்கை அரசுக்கு எதிராக பிரேரணை கொண்டுவரப்பட்டபோது ஜெனிவா சென்று அரசுக்கு எதிராக சிவராஜா சர்வதேச ஊடகங்களில் கருத்து வெளியிட்டிருந்தார்.
இந்தியாவிலிருந்து இயங்கும் இளைய தலைமுறை தொலைக்காட்சி நடத்திய நேரடி விவாதத்தில் ஜெனிவாவிலிருந்து கொண்டே அரசுக்கு எதிராகக் கருத்துத் தெரிவித்திருந்தார். அதேபோல் லண்டன் பி.பி.சி. தமிழோசையிலும் ஜெனிவாவில் இருந்தவாறு உண்மை நிலைவரத்தை எடுத்துக் கூறினார். அப்போது இவரை அரச சார்பு சிங்கள ஊடகங்கள் கடுமையாக விமர்சித்திருந்தன.
ஆனால் இன்று வயிற்றுப் பிழைப்புக்காக அரசுப் பக்கம் ஒட்டிக்கொண்டு என்னைப் பார்த்து நீலிக்கண்ணீர் வடிப்பதாகக் கூறுவது வேடிக்கையாக இருக்கின்றது. இவர் தனது ஜெனிவா பயணத்தை புரட்டிப் பார்க்கவேண்டும். அதன் பிறகு யார் நீலிக்கண்ணீர் வடிப்பது என்பதையும் யார் தமிழ் மக்களிடம் பகிரங்க மன்னிப்புக் கேட்க வேண்டும் என்பது தெரிய வரும்.

இலங்கை மீது திருப்தியில்லை-சல்மான் குர்ஷித்

இலங்கையில் தமிழர்களுக்கு அதிகாரங்களைப் பகிர்ந்தளிப்பதற்கு அச்சாணியாக இருக்கும், அவர்களின் பாதுகாப்பை ஓரளவேனும் உறுதி செய்யும் அரசமைப்பின் 13ஆவது திருத்தச் சட்டத்தை நடைமுறைப்படுத்தும் விடயத்தில் இலங்கை அரசின் நடவடிக்கை திருப்திகரமாக இல்லை'' என்று இந்திய வெளிவிவகார அமைச்சர் சல்மான் குர்ஷித் நேற்று தெரிவித்துள்ளார். இந்திய நாடாளுமன்றத்தின் மேலவையில் நேற்றுக் காலை பா.ஜ.க. உறுப்பினர் ரவிசங்கர் பிரசாத் எழுப்பிய கேள்வியயான்றுக்கு பதிலளித்தபோதே அவர் மேற்கண்டவாறு தெரிவித்தார். நாடாளுமன்ற மேலவை அமர்வின்போது, "இலங்கையில் தமிழர்கள் பாதுகாப்பாக வாழ 13 ஆவது திருத்தச்சட்டத்தை நடைமுறைப்படுத்த இந்தியா வலியுறுத்துமா என்று பா.ஜ.க. உறுப்பினர் ரவிசங்கர் பிரசாத் கேள்வி எழுப்பினார். அதற்குப் பதிலளித்த வெளிவிவகார அமைச்சர் சல்மான் குர்ஷித், "13 ஆவது திருத்தச் சட்டத்தை நடைமுறைப்படுத்த இலங்கை அரசு எடுத்த நடவடிக்கை திருப்திகரமாக இல்லை. 13 ஆவது திருத்தச்சட்டத்தை நடைமுறைப்படுத்தி தமிழர்கள் உட்பட இலங்கையில் வாழும் அனைத்து மக்களினதும் பாதுகாப்பான வாழ்வை உறுதிப்படுத்த வேண்டுமென்று இலங்கையை இந்தியா தொடர்ந்து வலியுறுத்தி வருகிறது'' என்று தெரிவித்தார்.

ஈழ நேருவை நாடு கடத்த இடைக்கால தடை!

ஈழத் தமிழரான ஈழ நேருவை இலங்கைக்கு நாடு கடத்த சென்னை உயர்நீதிமன்றம் இடைக்கால தடை விதித்திருக்கிறது. இலங்கை அகதிகளான செந்தூரன், ஈழ நேரு, சவுந்தரராசன் ஆகியோரை இலங்கைக்கு நாடு கடத்த மத்திய அரசு உத்தரவு பிறப்பித்திருக்கிறது. இதற்கு தமிழகத்தில் கடும் எதிர்ப்பு கிளம்பியுள்ளது. இந்நிலையில் ஈழ நேருவின் மனைவி, இது தொடர்பாக சென்னை உயர்நீதிமன்றத்தில் ஒரு மனுத்தாக்கல் செய்தார். அம் மனுவில், ஈழநேருவை இலங்கைக்கு அனுப்பினால் உயிருக்கு ஆபத்து இருக்கிறது. அதனால் அவரை இலங்கைக்கு அனுப்புவதற்கு தடை விதிக்க வேண்டும் என்று கோரியிருந்தார். இம்மனு மீது இன்று விசாரணை நடைபெற்றது. இந்த மனுவை பரிசீலனை செய்த நீதிபதி, ஈழ நேருவை இலங்கைக்கு அனுப்ப இடைக்கால தடை விதித்து உத்தரவிட்டார். மேலும், மனுதாரரின் புகார் தொடர்பாக மத்திய, மாநிலஅரசுகள் செப்டம்பர் 27-ந் தேதிக்குள் பதில் தரவேண்டும் என்றும் உத்தரவிட்டுள்ளார்.

இப்படியும் ஒரு கணவன்!

களுத்துறை பன்வில பிரதேசத்தில் இயங்கி வந்த விடுதியொன்றில் பாலியல் தொழில் நடப்பதாக களுத்துறை தெற்கு காவற்துறையினருக்கு கிடைத்த தகவல் ஒன்றை அடுத்து, அங்கு சுற்றுவளைப்பை மேற்கொண்ட காவற்துறையினர் பாலுறவுக்காக பெண்களை நாடிச் சென்றவர்கள் போல் சென்று அங்கிருந்த தரகர் ஒருவரை கைதுசெய்துள்ளனர்.
அத்துடன் அங்கிருந்த பெண்ணொருவரையும் காவற்துறையினர் கைதுசெய்துள்ளனர். ஏனைய பெண்கள் அங்கிருந்து தப்பிச் சென்றுள்ளனர். கைதுசெய்யப்பட்ட பெண் கண்டியை சேர்ந்தவர் எனவும் அவரை அவரது கணவரே பாலியல் தொழிலில் ஈடுபடுத்தி வந்துள்ளதாகவும் விசாரணைகளில் தெரியவந்துள்ளது.
வாகனம் ஒன்றுக்கு தவணைப் பணத்தை செலுத்துவதற்காக பெண்ணின் கணவர், பெண்ணை பாலியல் தொழிலில் ஈடுபடுத்தி வந்துள்ளதாக காவற்துறையினர் தெரிவித்துள்ளனர்.

மானிப்பாயில் வேட்பாளர் மீது தாக்குதல்!

வடமாகாண சபை வேட்பாளர் ஒருவரின் வீட்டிற்குள் இன்தெரியாத நபர்கள் அத்துமீறி நுழைந்து தாக்குதல் மேற்கொண்டுள்ளமை தொடர்பில் முறைப்பாடு பதிவு செய்யப்பட்டுள்ளதாக இலங்கைப் பொலிஸார் இன்று செவ்வாய்க்கிழமை தெரிவித்துள்ளனர். புதிய ஜனநாயக கட்சியின் வேட்பாளர் சேனாதிராஜா கிருஸ்ணகுமார் என்பவர் மீதே இவ்வாறு தாக்குதல் மேற்கொள்ளப்பட்டுள்ளது.
மானிப்பாய் பகுதியில் அமைந்துள்ள இவரது வீட்டிற்கு நேற்று திங்கட்கிழமை இரவு சென்ற சிலர் அவர் மீது தாக்குதலை மேற்கொண்டுவிட்டு தப்பிச்சென்றதாக் தெரிவிக்கப்படுகின்றது. தாக்குதலின்போது அவர் சிறிய காயங்களுக்கு உள்ளானதாகவும் மேலும் தெரியவருகிறது.

இராணுவ நிகழ்வில் முடியப்பு ரெமிடியஸ்!

இராணுவ நிகழ்வொன்றில் கலந்து கொண்ட ஐக்கிய மக்கள் சுதந்திர முன்னணியின் வேட்பாளரான முடியப்பு ரெமீடியஸ் தேர்தல் திணைக்களத்தின் உத்தியோகத்தர்களைக் கண்டதும் தலைமறைவாகிய சம்பவம் ஒன்று இன்று நாவாந்துறையில் இடம்பெற்றது. 512 ஆவது இராணுவத்தினரால் நாவாந்துறையில் 84,85,87,97 ஆகிய கிராம சேவையாளர் பிரிவைச் சேர்ந்த வறுமைக் கோட்டிற்கு கீழ்ப்பட்ட 20 குடும்பங்களுக்கு வீடுகள் அமைப்பதற்கான பொருட்கள் வழங்கும் நிகழ்வு இன்று நாவாந்துறை முஸ்லீம் பள்ளிவாசலுக்கு அருகில் இடம்பெற்றது. அந்தநிகழ்விற்கு ஜக்கிய மக்கள் சுதந்திர முன்னணியின் வேட்பாளரான சட்டத்தரணி ரெமீடியஸ் ககலந்து கொண்டிருந்தார். குறித்த விடயத்தினை அறிந்த தேர்தல் திணைக்கள உத்தியோகத்தர்கள் நிகழ்வு இடத்திற்கு நேரடியாக விஜயம் மேற்கொண்டனர். அவர்களது வருகையினை அவதானித்த ரெமிடியஸ் இடத்தை விட்டு தலைமறைவானார். இருப்பினும் சம்பவம் தொடர்பில் இராணுவத்தினரை அணுகிய திணைக்கள உத்தியோகத்தர்களை இராணுவ அதிகாரிகள் அவர்களை அச்சுறுத்தியதுடன் அவ்வாறான வேட்பாளர்கள் எவரும் கலந்து கொள்ளவில்லை என்றும் பொய் கூறி அனுப்பினர் என்பது குறிப்பிடத்தக்கது.

சிந்திய குருதி வீண் போகாது-எழிலன் அனந்தி

போரின் முடிவில் தனது கணவர் எழிலனை தானே சிறிலங்கா அரசாங்கத்திடம் ஒப்படைத்ததாகவும், அதற்கு சிறிலங்கா அரசாங்கமே பொறுப்புக் கூறவேண்டும் என்றும் தெரிவித்துள்ளார், வடக்கு மாகாணசபைத் தேர்தலில் தமிழ்த் தேசியக் கூட்டமைப்பின் சார்பில் யாழ்.மாவட்டத்தில் போட்டியிடும் அனந்தி சசிதரன் (எழிலன்).
யாழ்ப்பாணத்தில் நேற்று செய்தியாளர் சந்திப்பு ஒன்றை நடத்திய அவர்,
“நான் போரினால் பாதிக்கப்பட்டவள். வடக்கு மாகாணசபைத் தேர்தலில் நான் போட்டியிடுவதற்கு அதுவே காரணம்.
நான் விடுதலைப் புலிகள் இயக்கப் போராளியல்ல, ஆனால் எனது கவணர் எழிலன் விடுதலைப் புலிகள் இயக்கத்தில் இருந்தவர்.
வலயம் 4 முகாமில் வைத்து எனது கணவரை சிறிலங்கா இராணுவ அதிகாரியிடம் நானே ஒப்படைத்தேன்.
எனது கணவர் தற்போது எங்கிருக்கிறார் என்று இதுவரை எனக்குத் தெரியாது.
அவர் உயிருடன் இருப்பார் என்று நம்புகிறேன். சிறிலங்காவில் கணவரைத் தேடுவது எனது கடமை.
சிறிலங்கா அரசாங்கத்திடமே எனது கணவரை நான் ஒப்படைத்தேன்.
எனவே அவர் காணாமற்போயுள்ள நிலைக்கு சிறிலங்கா அரசாங்கமே பொறுப்புக்கூற வேண்டும்.
என்னைப் போன்ற பெண்களுடன் இணைந்து நானும் குரல் எழுப்பவுள்ளேன்.
போரினால் கணவனை இழந்த பெண்களுக்கும், முன்னாள் விடுதலைப் புலிகளின் மனைவிமாருக்கும் எந்தர வாழ்வாதாரத் திட்டங்களும் இல்லை.
பெண்களுக்கு எதிரான வன்முறைகள், சிறுவர்கள் தவறாக நடத்தப்படுதல், எமது காலாசார அழிப்புகளுக்கு எதிராக நான் போராடப் போகிறேன்.
இந்த தேர்தலில் வெற்றி பெறுவதன் மூலம் காணாமல்போனவர்களின் பிரச்சினையை அனைத்துலக மட்டத்திற்கு கொண்டு செல்ல முடியும் என்று எதிர்பார்க்கிறேன்.
அடுத்தவாரம் சிறிலங்கா வரும் ஐ.நா மனிதஉரிமை ஆணையாளர் நவநீதம்பிள்ளையை சந்திக்கும் வாய்ப்பு எனக்கும் வழங்கப்பட்டுள்ளது.
நவநீதம்பிள்ளையை சந்திக்கும் போது, போரினால் பாதிக்கப்பட்டவர்கள், காணாமற்போனவர்கள், கடத்தப்பட்டவர்களின் நிலை குறித்து, எடுத்துக் கூறுவேன்.
பல்வேறு எதிர்ப்புக்களுக்கு மத்தியில் தான் நான் தேர்தலில் போட்டியிடுகிறேன்.
பாதிக்கப்பட்டவர்கள் வாக்களித்து என்னை வெற்றிபெறச் செய்வார்கள் என்ற நம்பிக்கை எனக்கு உள்ளது.
கையில், ஒரு பையுடன் மட்டும் முள்ளிவாய்க்காலில் இருந்து வெளியே வந்த என்னையும், மூன்று பெண் குழந்தைகளையும், காப்பாற்றியது, இங்குள்ள மக்களும், புலம்பெயர் சமூகத்தினரும் தான்.
நாம் தோற்றுப்போன சமூகம் இல்லை என்பதை வெளிப்படுத்த வேண்டிய தேவை உள்ளது.
இதுவரை காலமும் நாங்கள் செய்த தியாகங்களும், சிந்திய குருதியும் வீண் போகாது எந்த என்பதை இந்த தேர்தலில் நாங்கள் நிரூபிப்போம்.” என்றும் அவர் தெரிவித்துள்ளார்.

மாணவர் படுகொலை ஐ..நா.மனித உரிமைகள் சபைக்கு!

திருகோணமலை மாணவர் படுகொலைச் சம்பவம் தொடர்பில் ஐ.நா.மனித உரிமைகள் சபையில் முறைப்பாடு செய்யப்பட உள்ளது.2006 ஆம் ஆண்டு ஜனவரி மாதம் ஐந்து மாணவர்கள் திருகோணமலை கடற்கரையில் வைத்து சுட்டுக்கொல்லப்பட்டனர்.இந்த சம்பவத்தில் உயிரிழந்த ரஜிகர் மனோகரன் என்ற மாணவரின் தந்தை மருத்துவர் காசிப்பிள்ளை மனோகரன் இது தொடர்பில் ஐ.நா.மனித உரிமைகள் சபையில் மனுவொன்றை தாக்கல் செய்ய உள்ளார்.எதிர் வரும் செப்ரெம்பர் மாதம் நடைபெறவுள்ள மனித உரிமைகள் சபையின் அமர்வின் போது இந்த மனு தாக்கல் செய்யப்பட உள்ளது.படுகொலைச் சம்பவங்கள் தொடர்பில் ஜனாதிபதியினால் நியமிக்கப்பட்ட விசாரணை ஆணைக் குழுவின் அறிக்கை பகிரங்கப்படுத்தப்பட வேண்டும் எனக் கோரி, மனோகரன் மனித உரிமைகள் சபையில் மனு ஒன்றைத் தாக்கல் செய்ய உள்ளார். இந்தச் சம்பவம் தொடர்பில் ஆணைக்குழுவுக்கு தாம் சாட் சியமளித்துள்ளதாகவும், இத னால் விசாரணை அறிக்கை தொடர்பில் அறிந்து கொள்ளும் உரிமை தமக்கு இருப்ப தாகவும் மருத்துவர் மனோகரன் தெரிவித்துள்ளார். உண்மையான கொலையாளிகளையும் என்ன நேர்ந்தது என்பதனையும் இந்த அறிக் கையின் மூலம் புரிந்து கொள்ள முடியும் எனக் கருதுவதாக அவர் குறிப்பிட்டுள்ளார். இதேவேளை, இந்தச் சம்பவத்துடன் தொடர்புடைய குற்றச் சாட்டின் பேரில் 12 விசேட அதிரடிப்படை அதிகாரிகள் கைது செய்யப்பட்டுத் தடுத்து வைக்கப்பட்டுள்ளமை குறிப்பிடத்தக்கது.

இயக்குனர் மணிவண்ணனின் மனைவி மரணம்!

கணவர் இறந்த 2 மாதத்தில் நடிகரும், இயக்குனருமான மணிவண்ணனின் மனைவி செங்கமலம் மரணம் அடைந்தார். இயக்குனரும், நடிகருமான மணிவண்ணன் கடந்த ஜூன் மாதம் 15ம் தேதி மாரடைப்பால் மரணம் அடைந்தார். அவருக்கு செங்கமலம்(55) என்ற மனைவியும், ரகுவண்ணன் என்ற மகனும், ஜோதி என்ற மகளும் உள்ளனர். செங்கமலத்தால் கணவர் திடீர் என்று இறந்த அதிரிச்சியில் இருந்து மீள முடியவில்லை. அவர் மகனுடன் சென்னை கே.கே.நகர் ஜெய்பாலாஜி நகர் திருமலை தெருவில் உள்ள வீட்டில் வசித்து வந்தார். இந்நிலையில் கடந்த சில நாட்களுக்கு முன்பு அவரது உடல் நலம் பாதிக்கப்பட்டது. மருத்துவமனையில் சிகிச்சை பெற்றும் பலனில்லை. இந்நிலையில் அவர் இன்று அதிகாலை மரணம் அடைந்தார். செங்கமலத்தின் உடலுக்கு நாம் தமிழர் கட்சி தலைவர் சீமான் மற்றும் அவரது கட்சி நிர்வாகிகள் அஞ்சலி செலுத்தினர். இது குறித்து தகவல் அறிந்த திரையுலகினர் செங்கமலத்தின் உடலுக்கு அஞ்சலி செலுத்தி வருகின்றனர். அவரது இறுதிச் சடங்கு இன்று மாலை நடைபெறுகிறது.

அனைத்துலக விசாரணைக்கு பிரதமர் உருத்திரகுமாரன் கோரிக்கை!

ஐக்கிய நாடுகள் பட்டயத்தின் 99ம் விதியின் கீழ் ஐ.நா செயலாளர் நாயகம் தனது உட்கிடையான அதிகாரங்களை பயன்படுத்தி முள்ளிவாய்கால் இனப்படுகொலை தொடர்பான அனைத்துலக விசாரணை ஒன்றை கொண்டுவர அமெரிக்க அரசு தனது தார்மீக, இராஜதந்திர வளங்களை பயன்படுத்த வேண்டுமென நாடுகடந்த தமிழீழ அரசாங்கத்தின் பிரதமர் விசுவநாதன் உருத்திரகுமாரன் அவர்கள், ஐ.நாவுக்கான அமெரிக்க தூதுவர் சமந்தபவரிடம் அவர்களின் கோரிக்கையொன்றினை முன்வைத்துள்ளார்.
ஐ.நாவுக்கான அமெரிக்க தூதுவர் சமந்தபவரிடம் அவர்களுக்கு இவ்விவகாரம் தொடர்பில் எழுத்தியுள்ள கடித்திலேயே இக்கோரிக்கையினை நாடுகடந்த தமிழீழ அரசாங்கத்தின் பிரதமர் விசுவநாதன் உருத்திரகுமாரன்அவர்கள் முன்வைத்துள்ளார்.
21ம் நூற்றாண்டில் நடைபெற்ற மிகக்கொடுமையான இன அழிப்புகளில் முள்ளிவாய்க்கால் இனஅழிப்பு ஒன்றென்றும், இவ் இனஅழிப்பு அமெரிக்க அரசுத் தலைவர் ஒபமாவின் காலத்திலேயே இடம் பெற்றதெனவும் இக் கடிதத்தில் சுட்டிக்காட்டியுள்ளார்.
ஐக்கிய நாடுகள் செயலாளர் நாயகத்தின் நிபுணர் குழு அறிக்கையிலும், ஐக்கிய நாடுகள் சபையின் உள்ளக விமர்சன அறிக்கையிலும், அமெரிக்க சர்வதேச சட்ட சஞ்சிகையில் பிரசுரமான பேராசிரியர் ஸ்டீவன் ரட்ணரின் ஆய்வுக்கட்டுரையிலும் நீதி வழங்குவதற்காக அரசியல் சூழலும், நீதிபரிபாலன சூழலும் சிறிலங்காவின் உள்ளே இல்லை என குறிப்பிடப்பட்டுள்ளமை ஆகிய விடயங்கள் இக்கடிதத்தில் சுட்டிக்காட்டப்பட்டுள்ளது. எனவே அனைத்துலக விசாரணை ஒன்றின் மூலமே நீதி வழங்கலாம் என கடிதத்தில் வலியுறுத்தப்பட்டுள்ளது.
ஐக்கிய நாடுகள் மனித உரிமைகள் அமைப்பில் அரசியல் நலன்கள் prevalent ஆக இருப்பதால் அனைத்துலக விசாரணைக்கான பொறிமுறை ஐக்கிய நாடுகள் பட்டத்தின் 99வது விதியின் கீழ் அமைக்கலாம், அமைக்க வேண்டுமென நாடுகடந்த தமிழீழ அரசாங்கத்தின் நிலைப்பாட்டை பிரதமர் வி.உருத்திரமாரன் அவர்கள் தனது கடிதத்தில் தெளிவாக இடித்துரைத்துள்ளார். இக்கருத்துடன் ஐக்கியநாடுகள் செயலாளர் நாயகத்தின் சட்ட ஆலோசகர்கள், அனைத்துலக மன்னிப்புச்சபை, மனித உரிமைகள் கண்காணிப்பம், அனைத்துலக நெருக்கடிகளுக்கான குழு ஆகியனவும் ஒருமித்துள்ளதாக கடிதத்தில் சுட்டிக்காட்டப் பட்டுள்ளது.
தண்டனையினை (Impunity) சகித்துக்கொள்வது பாதிக்கப்பட்டவர்களுக்கு ஆபத்து விளைவிக்கும். மேலும் தேசிய இனப் பிரச்சனைகள் தொடர்பாக பிற நாடுகளுக்கும் ‘சிறிலங்காக் தீர்வு’ என்னும் தவறான முன்னுதாரணமாக மாறிவிடும். அது அனைத்துலக பாதுகாப்பிற்கும் சமாதானத்திற்கும் அச்சுறுத்தலாக அமைந்துவிடும் என்பது சொல்லத் தேவையில்லை என அக்கடித்தில் குறிக்கப்பட்டுள்ளதோடு நாடுகடந்த தமிழீழ அரசாங்கமானது ஐ.நாவுக்கான சமந்தா பவர் அவர்களின் நியமனம் அமெரிக்கவின் செனட் சபையினால் அங்கிகாரப்பட்டமைக்கு வாழ்த்தினை தெரிவித்துக் கொள்கின்றது எனவும் தெரிவிக்கப்பட்டுள்ளது.
21ம் நூற்றாண்டில் அனைத்துலக குடிசார் சமுகம், அனைத்துலக உறவுகளில் முக்கிய பங்கு வகிக்கின்றது. உலகமயமாக்கலும் தொழில்நுட்ப புதுமைகளும் (Technological innovation) மக்கள்சக்தியின் மேலிருந்த தடையினை (மூடியை) நீக்கிவிட்டுள்ளது. இதன் அடிப்படையில், நாடுகடந்த தமிழீழ அரசாங்கம் ஐக்கிய செயலாளர் நாயகத்தின் மேல் தார்மீக அழுத்தத்தை ஏற்படுத்துவதற்காக அனைத்து குடிசார் சமுகத்தை ஒருங்கிணைத்து வருகின்றது. ஐக்கிய நாடுகள் பட்டத்தின் 99ம் பிரிவின் கீழ் விசாரணை பொறிமுறையை அமைக்க கோரி, 1000 அரசுசார்பற்ற நிறுவனங்களின் ஆதரவினை, நாடுகடந்த தமிழீழ அரசாங்கம் திரட்டி வருகின்றமையும் தூதுவர் சமந்தா பவரின் கவனத்திற்கு கொண்டுவரப் பட்டுள்ளது.

தமிழீழமே இறுதித்தீர்வு-மே பதினேழு இயக்கம்

வட தமிழீழத்தில் நடைபெற இருக்கும் மாகாணசபை தேர்தலுக்கு எதிராகவும் தமிழீழத்திற்கான பொது வாக்கெடுப்பை நடத்தக்கோரியும் மே பதினேழு இயக்கம் 17-08-2013, மாலை 4 மணியளவில் வள்ளுவர் கோட்டத்தில் மாபெரும் போராட்டத்திற்கு அழைப்பு விடுத்துள்ளது.

மெட்ராஸ் கபே படத்தில் தேசியத்தலைவராக அஜய்?

மெட்ராஸ் கஃபே படத்தில் அஜய் ரத்னம் தமிழீழ தேசியத் தலைவர் மேதகு வேலுப்பிள்ளை பிரபாகரன் போன்று உடையணிந்து, மீசை வைத்துள்ளார்.
ஷூஜித் சர்கார் இயக்கத்தில் ஜான் ஆபிரகாம், நர்கிஸ் ஃபக்ரி உள்ளிட்டோர் நடித்துள்ள இந்தி படம் மெட்ராஸ் கஃபே. படத்தில் 1990களில் இலங்கையில் ராணுவத்திற்கும், விடுதலைப் புலிகளுக்கும் இடையே நடந்த போர் குறித்து காட்டுகிறார்களாம். படத்தில் விடுதலைப் புலிகளை தீவிரவாதிகள் போன்று சித்தரித்துள்ளனர் என்று தமிழ் அமைப்புகள் குற்றம்சாட்டியுள்ளன. மேலும் படத்திற்கு தடை விதிக்க வேண்டும் என்றும் வலியுறுத்தி வருகின்றன.
இந்நிலையில் படத்தில் நடித்துள்ள அஜய் ரத்னத்தின் புகைப்படம் வெளியாகியுள்ளது. அதில் அவர் தமிழீழ தேசியத்தலைவர் வேலுப்பிள்ளை பிரபாகரன் போன்று உடை அணிந்துள்ளார். மேலும் அவரைப் போன்றே மீசையும் வைத்துள்ளார். அஜய்யை பார்த்தால் தேசியத் தலைவர்தான் நினைவுக்கு வருகிறார். இதனால் அஜய் தேசியத்தலைவராக நடித்துள்ளாரோ என்ற சந்தேகம் எழுந்துள்ளது.
இயக்குனரை கேட்டால் இது ஒரு படம், தயவு செய்து எதுவும் யூகிக்காதீர்கள் என்கிறாராம்.

பதவி விலகுமாறு கோருவதற்கு ரிசாட் பதியூதீனுக்கு உரிமையில்லை!

அமைச்சர் ரிசாட் பதியூதீனின் கோரிக்கைக்காக பதவி விலகப் போவதில்லை என காவல்துறை மா அதிபர் என்.கே. இளங்கக்கோன் தெரிவித்துள்ளார். கிராண்ட்பாஸ் ஸ்வர்ன மாவத்தையில் பள்ளிவாசல் மீதான தாக்குதல் மற்றும் வன்முறைச் சம்பவங்களைத் தொடர்ந்து, காவல்துறை மா அதிபர் பதவியை ராஜினாமா செய்ய வேண்டுமென அமைச்சர் ரிசாட் பதியூதீன் கோரியிருந்தார். எனினும் அமைச்சரின் கோரிக்கையை ஏற்றுக்கொள்ளப் போவதில்லை, ஜனாதிபதி மஹிந்த ராஜபக்ஷவே தம்மை நியமித்ததாகவும், தம்மை பதவி விலகுமாறு கோர அமைச்சருக்கு உரிமையில்லை. குறைந்தளவான அதிகாரத்தைப் பயன்படுத்தி மோதலைக் கட்டுப்படுத்துமாறு பாதுகாப்பு அமைச்சு உத்தரவிட்டிருந்தது. இந்த உத்தரவிற்கு அமையவே காவல்துறையினர் கிராண்ட்பாஸ் பகுதியில் இடம்பெற்ற மோதல்களின் போது செயற்பட்டதாகவும். வெலிவேரியவில் இடம்பெற்றதனைப் போன்ற சம்பவங்கள் இடம்பெற வேண்டும் என அமைச்சர் பதியூதீன் விரும்புகின்றாரா என அவர் கேள்வி எழுப்பியுள்ளார்.

கொழும்பில் தொடர்ந்து பதற்றம்!

கொழும்பு கிரான்ட்பாஸ் பகுதியில் உள்ள முஸ்லிம்களின் மசூதி மீது நேற்றுமாலை, பௌத்த அடிப்படைவாத குண்டர்களால் தாக்குதல் நடத்தப்பட்டதையடுத்து பதற்றநிலை ஏற்பட்டுள்ளது.
கிரான்ட்பாஸ் சுவர்ண சைத்திய வீதியில் உள்ள மாடிக்கட்டடத்தில் புதிதாக அமைக்கப்பட்ட மசூதி மீது, நேற்று மாலை தொழுகை முடிந்த பின்னர், சுமார் 100 பேர் வரையிலான பௌத்த அடிப்படைவாதிகள் தாக்குதல் நடத்தினர்.
இதன்போது, அருகிலுள்ள வீடுகள், வாகனங்களும் அடித்து நொருக்கப்பட்டன.
இந்தச் சம்பவத்தில் மசூதிக்குப் பாதுகாப்பு வழங்கிய இரு காவல்துறையினர் உள்ளிட்ட 8 பேர் காயமடைந்து கொழும்பு தேசிய மருத்துவமனையில் அனுமதிக்கப்பட்டுள்ளனர்.
இதையடுத்து, சிறிலங்கா காவல்துறையின் சிறப்பு அதிரடிப்படையினர் குவிக்கப்பட்டு பாதுகாப்பு பலப்படுத்தப்பட்டுள்ளது.
மேலும் நேற்றிரவு தொடக்கம் இன்று காலை 7 மணிவரையும் கிரான்ட்பாஸ் பகுதியில் ஊரடங்குச்சட்டம் பிரகடனப்படுத்தப்பட்டது.
சுவர்ண சைத்திய வீதியில் உள்ள இந்த மசூதியை அகற்ற வேண்டும் என்று கோரி கடந்த மாதம் பொதுபல சேனாவின் பெளத்த பிக்குகளும், பௌத்த அடிப்படைவாதிகளும் போராட்டம் நடத்தியிருந்தனர் என்பது குறிப்பிடத்தக்கது.

நாவற்குழி சிங்கள குடியேற்றத்தில் கைக்குண்டுவெடிப்பு!

நாவற்குழியில் அமைந்துள்ள சிங்கள குடியேற்றப்பகுதியில் குண்டுவெடிப்பு சம்பவமொன்று இன்றிரவு நடந்துள்ளது. யாழ்.நகரின் நுழைவாயிலான நாவற்குழிப் பகுதியில் அண்மையில் முளைத்துள்ள குறித்த சிங்கள குடியேற்றத்திட்டத்தில் அமைந்துள்ள தர்மசால எனப்படும் யாத்திரீகர் மடம் மீதே கைக்குண்டு தாக்குதல் நடத்தப்பட்டுள்ளது. இன்றிரவு சுமார் எட்டு மணியளவினில் இத்தாக்குதல் நடந்துள்ளது.
கார் ஒன்றில் சென்றவர்களே தாக்குதலை நடத்திவிட்டு தப்பித்துச் சென்றதாக அருகாகவுள்ள சிங்கள குடியேற்றவாசிகள் தெரிவித்தனர். குண்டு வெடித்த வேளை அப்பகுதியில் எவரும் தங்கியிராமையினால் ஆட்சேதங்கள் ஏற்பட்டிருக்கவில்லை என கூறப்படுகின்றது.
வீடமைப்பு அதிகாரசபைக்கு சொந்தமான குறித்த காணியில் கடந்த இருவருடங்களிற்கு முன்னதாக அடாத்தாக குடியேறிய சிங்கள குடியேற்றவாசிகளிற்கு பொதுபல சேனா தற்போது நிரந்தர வீடுகளை கட்டி வழங்கிவருகின்றது. எனினும் பாதுகாப்பிற்காக குறித்த குடியேற்றபகுதியின் நடுவிலும் சூழவும் படையினர் நிலைகொள்ளவைக்கப்பட்டு உள்ளதுடன் நிரந்தர படைமுகாம்களும் அமைக்கப்பட்டுள்ளது.
குறித்த சிங்கள குடியேற்றவாசிகளை எவரும் சந்திப்பதாயின் படை முகாமில் அனுமதி பெற்றபின்னரே சந்திக்க முடியும். இந்நிலையில் அண்மையில் பெருமெடுப்பில் குடியேற்றவாசிகளது வழிபாட்டிற்கு புதிய விகாரையொன்றும் இப்பகுதியில் அமைக்கப்பட்டும் வருகின்றது.
தேர்தல் அறிவிப்பு மற்றும் அது தொடர்பான பரபரப்பினிடையே இக்குண்டு வெடிப்பு நடந்துள்ள போதும் படைத்தரப்பினர் இடையிலோ குடியேற்றவாசிகள் இடையிலோ பரபரப்பு காணப்படாதது சந்தேகங்களை எழுப்புவதாக உள்ளதென
செய்தியாளர் தெரிவித்துள்ளார்.

விமானப்படையை நவநீதம்பிள்ளை நம்பவில்லையென ரம்புக்கல கவலை!

இலங்கைக்கு விஜயம் செய்ய உள்ள ஐ.நா. மனித உரிமை ஆணையாளர் நவநீதம்பிள்ளைக்கு இலங்கை விமானப்படையின் விமானங்கள் மீது நம்பிக்கை இல்லையாம். இனி நாம் என்ன செய்வது? அப்படியானால் ஐ.நா. விமானத்திலேயே வர வேண்டும் என அமைச்சரவை பேச்சாளரும் ஊடக அமைச்சருமான கெஹெலிய ரம்புக்வெல தெரிவித்துள்ளார். நவநீதம்பிள்ளை ஐ.நா. விமானத்திலேயே வந்து வடக்கு உட்பட தேவையான அனைத்து இடங்களுக்கும் சென்று எதிர்பார்க்கும் உண்மைகளை கண்டறிய அரசாங்கம் இடமளிக்கும். உலகத்தில் வேறு எந்தவொரு நாட்டிலும் மோதல் சம்பவங்கள் இடம்பெறுவதில்லையா? வெலிவேரியவில் ஒரு சம்பவம் நடந்து முடிந்துவிட்டது. இதனை மீண்டும் தூண்டி அரசியலாக்க எதிர்க்கட்சிகள் முற்படுவது நியாயமில்லை என ரம்புக்கல தெரிவித்துள்ளதுடன்,பொதுநலவாய மாநாட்டை பாதிக்கும் அல்லது ஐ.நா. மனித உரிமை பேரவையின் இலங்கைக்கு எதிராக மேலும் நெருக்கடிகள் வலுவடையும் என்பதெல்லாம் உள்நோக்கங்களைக் கொண்ட பிரசாரங்கள் எனவும் ரம்புக்கல குறிப்பிட்டுள்ளார்.

புலிகள் அமைப்புடன் தொடர்புகளை வைத்திருந்த 05 பேர் தேர்தலில்!

விடுலைப்புலிகள் அமைப்புடன் நேரடியான தொடர்புகளை வைத்திருந்த 05 பேர் வடக்கு மாகாண சபைத் தேர்தலில் போட்டியிடுவதாக தெரியவந்துள்ளது என திவயின தெரிவித்துள்ளது.
தமிழ்த் தேசியக் கூட்டமைப்பின் அரசியல்வாதி ஒருவரே இவர்களை மீண்டும் அரசியல் அரங்கிற்கு கொண்டு வந்துள்ளதாக தெரியவந்துள்ளது.
இந்த அரசியல்வாதி புலிகளின் யாழ்ப்பாண கட்டளை தளபதியான தீபனின் நெருங்கிய உறவினர் எனவும் திவயின கூறியுள்ளது.
தமிழ்த் தேசியக் கூட்டமைப்பில் போட்டியிடும் ஆனந்தி என்ற பெண், புலிகளின் திருகோணமலை மாவட்ட அரசியல் துறை பொறுப்பாளர் எழிலனின் மனைவி எனவும் அதில் கூறப்பட்டுள்ளது.

காணிகள் சுவீகரிப்புக்கு எதிராக சம்பந்தன் உரை!

வடக்கு, கிழக்கில் தமிழ் மக்களின் காணிகள் இராணுவத்தினரால் அபகரிக்கப்படுவதைக் கண்டித்து தமிழ்த் தேசியக் கூட்டமைப்பு இன்று நாடாளுமன்றில் குரல் கொடுக்கவுள்ளது. காணி அபகரிப்புத் தொடர்பில் நாடாளுமன்றில் கூட்டமைப்பு சமர்ப்பித்த பிரேரணை இன்று மாலை விவாதத்திற்கு எடுத்துக் கொள்ளப்படும்போது இதுதொடர்பில் கூட்டமைப்பின் நாடாளுமன்றக்குழுத் தலைவர் இரா.சம்பந்தன் முதலில் உரையாற்றவுள்ளார். அதனைத் தொடர்ந்து எதிர்க்கட்சியினரும் ஆளுந்தரப்பினரும் தங்கள் வாதங்களை முன்வைக்கவுள்ளனர்.

அடடே,சிறீலங்கா பொலிசாரா இப்படி?!

ஆற்றில் குதித்த யுவதியை காப்பாற்றிய பொலிஸ் உத்தியோகத்தர்கள் இருவர் பாராட்டப்பட்டப்பட்டுள்ளனர். கே. பண்டார (பி.சி. 77890) மற்றும் ஏ.பி. ஜயசிங்க (பி.சி. 75821) ஆகிய போக்குவரத்து பொலிஸாரே மட்டக்களப்பு மாவட்ட பிரதிப் பொலிஸ் மா அதிபர் வி. இந்திரனினால் பாராட்டப்பட்டுள்ளனர்.
மட்டக்களப்பு பழைய கல்லடிப் பாலத்திலிருந்து தற்கொலை செய்யும் நோக்கோடு ஆற்றினுள் 28 வயதுடைய யுவதி குதித்துள்ளார். இதன்போது கல்லடிப் பாலத்தில் கடமையிலிருந்த குறித்த இரண்டு பொலிஸாரும் ஆற்றினுள் பாய்ந்து உயிருக்கு போராடிய பெண்ணை மீட்டுள்ளனர்.
இந்த துணிகர முயற்சியை கேள்வியுற்ற மட்டக்களப்பு பிரதிப் பொலிஸ் மா அதிபர் வி.இந்திரன் இரண்டு போக்குவரத்து பொலிஸாரையும் அழைத்துப் பாராட்டியுள்ளமை குறிப்பிடத்தக்கது. தற்போது வைத்தியசாலையில் அனுமதிக்கப்பட்டுள்ள குறித்த பெண்ணிடம் மட்டக்களப்பு பொலிஸார் மேலதிக விசாரணைகளை மேற்கொண்டு வருகின்றனர்.

ஜெயரட்ணத்தை கடத்தியது கபில் அம்மானின் ஆட்கள்!

ஜெயரெத்தினம் மனைவியுடன் 

கொழும்பில் கடத்திச் செல்லப்பட்ட சிறிலங்கா காவல்துறையின் புலனாய்வு நிபுணரான இன்ஸ்பெக்டர் ஜெயரட்ணம் மற்றும், சிறிலங்கா இராணுவ கப்டன் லக்கி ஆகியோர் விடுதலைப் புலிகளால் கொல்லப்பட்டதாக, விடுதலைப் புலிகள் புலனாய்வுப் பிரிவில் கபில் அம்மான் தலைமையில் இயங்கிய முன்னாள் உறுப்பினர் ஒருவர் தகவல் வெளியிட்டுள்ளார்.
இது தொடர்பாக சிறிலங்கா காவல்துறையின் தடுப்புக்காவலில் உள்ள அவர், தீவிரவாத முறியடிப்புப் பிரிவைச் சேர்ந்த இன்ஸ்பெக்டர் ஜெயரட்ணம், சிறிலங்கா இராணுவ கப்டன் லக்கி, வவுனியாவைச் சேர்ந்த புலனாய்வாளர் இப்ராகிம் உள்ளிட்ட, தாம் பிடித்து வைத்திருந்த 80 பேரை விடுதலைப் புலிகள் கொன்று விட்டதாக கூறியுள்ளார்.
வள்ளிபுனத்தில் உள்ள அல்பா 5, புதுக்குடியிருப்பில் உள்ள அல்பா 2 ஆகிய சிறைகளில் வைத்து இவர்கள் கொல்லப்பட்ட பின்னர், அவர்களின் உடல்கள் எரிக்கப்பட்டதாகவும் அவர் கூறியுள்ளார்.
இந்தக் கொலைகளுடன் தொடர்புடைய மேலும் மூன்று விடுதலைப் புலிகள், இயக்க உறுப்பினர்கள் மூவர் மன்னார், யாழ்ப்பாணம், கிளிநொச்சி ஆகிய இடங்களில் வைத்து கடந்த சனிக்கிழமை கைதுசெய்யப்பட்டுள்ளதாக சிறிலங்கா காவல்துறை தெரிவித்துள்ளது.
அவர்களும், கபில் அம்மான் தலைமையில், இயங்கியவர்கள் என்றும், சிறிலங்காப் படை அதிகாரிகளின் கடத்தல்கள், கொலைகளுடன் தொடர்புடையவர்கள் என்றும் சிறிலங்கா காவல்துறை தகவல் வெளியிட்டுள்ளது.
இன்ஸ்பெக்டர் ஜெயரட்ணம், கல்கிசை காவல் நிலையத்தில், தீவிரவாத விசாரணைப் பிரிவுக்குப் பொறுப்பாக இருந்து வந்தார்.
விடுதலைப் புலிகளுக்கு எதிரான புலனாய்வு நடவடிக்கைகளில் சிறப்பாகப் பணியாற்றிய அவர், 2005 ஏப்ரல் 20ம் நாள், கல்கிசையில் உள்ள விடுதி ஒன்றில் இருந்து கடத்தப்பட்டு காணாமற்போனார்.
வெள்ளை வான் ஒன்றில் கடத்தப்பட்ட இன்ஸ்பெக்டர் ஜெயரட்ணம், சிலாபம் வழியாக படகு மூலம் மன்னாருக்கு கொண்டு செல்லப்பட்டு, அங்கிருந்து கிளிநொச்சிக்குக் கொண்டு செல்லப்பட்டதாகவும் கைதான புலிகள் இயக்க சந்தேக நபர் கூறியுள்ளார்.
இன்ஸ்பெக்டர் ஜெயரட்ணம், இராணுவ கப்டன் லக்கி மற்றும் தம்மைக் காட்டிக் கொடுத்ததாக சந்தேகித்த பலரையும், இரண்டு தடுப்பு முகாம்களிலும் தடுத்து வைத்திருந்ததாகவும் முன்னாள் புலி உறுப்பினர் தெரிவித்துள்ளார்.
கைது செய்யப்பட்டு தடுத்து வைத்திருந்த சுமார் 30 பேர், கண்கள் கட்டப்பட்டு 2006ம் ஆண்டு மே மாதம் ஒட்டுசுட்டான் காட்டுக்குள் கொண்டு செல்லப்பட்டு கொல்லப்பட்டதாகவும் அவர் கூறியுள்ளார்.
இரண்டு மாதம் கழித்து, 2006 ஜுலையில், மேலும் 50 பேர் இவ்வாறு கொல்லப்பட்டதாகவும் அனைவரது சடலங்களும் எரிக்கப்பட்டதாகவும் அவர் மேலும் தெரிவித்துள்ளார்.
சந்தேகநபர் வெளியிட்டுள்ள தகவலின் படி இன்ஸ்பெக்டர் ஜெயரட்ணம், 2006 செப்ரெம்பர் மாதம் வள்ளிபுனம் காட்டில் வைத்து கொல்லப்பட்டுள்ளார்.
விசுவமடு தொட்டியடி முகாமில் தடுத்து வைக்கப்பட்டிருந்த இராணுவ கப்டன் லக்கி, 2009இல் கொல்லப்பட்டுள்ளார்.
இதற்கிடையே, கைது செய்யப்பட்ட புலிகள் இயக்க முன்னாள் உறுப்பினர்களுக்கு பொறுப்பாக இருந்த காந்தி என்ற புலிகள் இயக்க முக்கிய தலைவரை கண்டுபிடிப்பதற்கான விசாரணைகள் நடத்தப்பட்டு வருவதாகவும் சிறிலங்கா காவல்துறை கூறியுள்ளது.

அரச நிகழ்வில் தேர்தல் பிரசாரம்!

டக்ளஸ்,ஹத்துருசிங்க 

வடக்குத் தேர்தலில் போட்டியிடும் அரசியல் கட்சி ஒன்றுக்கு ஆதரவாக அமைச்சர் ஒருவரும், படையினரும், அரச அதிகாரிகளும் அரச நிகழ்வைப் பயன்படுத்திய போதும் தேர்தல்கள் திணைக்களத்தினாலேயோ, பொலிஸாராலேயோ அது குறித்து எந்தவொரு நடவடிக்கையும் எடுக்கப்படவில்லை என்று குற்றஞ்சாட்டப்பட்டுள்ளது. வட மாகாண சபைத் தேர்தல் திகதி அறிவிக்கப்பட்டதன் பின்னர் யாழ்ப்பாணத்தில் இடம்பெற்ற இந்தச் சம்பவம் தொடர்பில் நடவடிக்கை எடுக்க வேண்டிய தரப்புக்கள் மௌனம் சாதிப்பது நீதியான தேர்தல் இடம்பெறுமா என்ற சந்தேகத்தைத் தோற்றுவித்துள்ளதாகத் தமிழ்த் தேசியக் கூட்டமைப்பு குற்றஞ்சாட்டியுள்ளது. வட மாகாண சபைக்கான தேர்தல் எதிர்வரும் செப்ரெம்பர் மாதம் 21 ஆம் திகதி இடம்பெறும் என்று இந்த மாதம் முதலாம் திகதி தேர்தல்கள் ஆணையாளரால் அறிவிக்கப்பட்டிருந்தது. இந்த நிலையில் நேற்று முன்தினம் வெள்ளிக்கிழமை இராணுவம் வைத்திருந்த வீடுகளைக் கையளிக்கும் நிகழ்வு அரியாலையில் இடம்பெற்றது. இந்த நிகழ்வில் யாழ்.மாவட்ட இராணுவத் தளபதி மேஜர் ஜெனரல் மஹிந்த ஹத்துருசிங்க, அமைச்சர் டக்ளஸ் தேவானந்தா, யாழ். மாவட்ட மேலதிக அரச அதிபர் திருமதி ரூபினி வரதலிங்கம், வட மாகாண ஆளுநர் மேஜர் ஜெனரல் ஜி.ஏ. சந்திரசிறி ஆகியோர் கலந்து கொண்டிருந்தனர். இவர்களுடன்ஆளும்கட்சி சார்பில் வட மாகாண சபைத் தேர்தலில் யாழ்.மாவட்டத்தில் போட்டியிடும் வேட்பாளர் சட்டத்தரணி முடியப்பு றெமிடியஸூம் கலந்து கொண்டார். இதனை விட இந்த நிகழ்வில் உரையாற்றிய அமைச்சர் டக்ளஸ், ஆளும் கட்சிக்கு எதிர்வரும் தேர்தலில் ஆதரவாக வாக்களிக்குமாறும் கேட்டுக் கொண்டார். தேர்தல்கள் விதிமுறைகளின் பிரகாரம், தேர்தல்கள் அறிவிக்கப்பட்டதன் பின்னர் அரச நிகழ்வில் அரசியல் எதுவும் பேசக் கூடாதென்பதுடன், தேர்தலில் போட்டியிடும் வேட்பாளர்கள் யாரும் அவ்வாறான நிகழ்வுகளில் பங்கெடுக்கக் கூடாது. ஆயினும், இவற்றை மீறி நடந்த இந்த நிகழ்வுக்கு எதிராக சம்பந்தப்பட்ட தரப்புக்கள் எந்த நடவடிக்கைகளும் எடுக்க முன்வரவில்லை என்று தெரிவிக்கப்படுகின்றது.

தீருவில் பூங்கா சேதப்படுத்தப்பட்டுள்ளது!

யாழ்ப்பாணம் வல்வெட்டித்துறை தீருவில் பொதுப் பூங்கா இனந்தெரியாத நபர்களினால் சேதப்படுத்தப்பட்டுள்ளதாகவும் இந்த சம்பவத்தின் பின்னணியில் இராணுவம் இருப்பதாகவும் தமிழ்த் தேசியக் கூடட்மைப்பு குற்றம் சுமத்தியுள்ளது.
இந்த பகுதியில் விடுதலைப்புலிகளின் நினைவிடம் ஒன்று இருந்ததுடன் போருக்கு பின்னர் அதனை இராணுவத்தினர் முற்றாக சேதப்படுத்தியிருந்தனர். இந்த நிலையில் வல்வை நகர சபைக்கு சொந்தமான பூங்காவை புனரமைத்து, நகர சபை மக்களின் பாவனைக்கு வழங்கியிருந்தது.
இதற்கு முன்னர் நீதிமன்றத்தில் வழக்கொன்றை தாக்கல் செய்திருந்த இராணுவத்தினர் குறித்த பூங்கா தமக்குரியது எனவும் அதனை தமக்கு வழங்குமாறு கோரியிருந்தனர். அதனை நீதிமன்றம் நிராகரித்த நிலையில் மேற்படி பூங்கா நேற்று முன்தினம் இனந்தெரியாதவர்களினால் சேதப்படுத்தப்பட்டுள்ளது.

வாசுதேவ நாணயக்காரவையும் பகைக்கிறார் மகிந்த!

வாசுதேவ நாணயக்கார 

சிறிலங்கா அமைச்சர் வாசுதேவ நாணயக்காரவின் இடதுசாரி ஜனநாயக முன்னணியின் வேட்பாளரை, ஆளும் ஐக்கிய மக்கள் சுதந்திர முன்னணி கடைசி நேரத்தில் நீக்கியுள்ளது. ஆளும்கட்சியின் இந்த நடவடிக்கை குறித்து, கடும் விசனம் கொண்டுள்ள வாசுதேவ நாணயக்கார, இது குறித்து சிறிலங்கா ஜனாதிபதிக்கு கடிதம் எழுதியுள்ளார். ஐக்கிய மக்கள் சுதந்திர முன்னணியில் போட்டியிட வவுனியா மாவட்டத்தில், இடதுசாரி ஜனநாயக முன்னணிக்கு ஒதுக்கப்பட்ட ஒரு இடத்துக்கு, சங்கரலிங்கம் என்ற வேட்பாளரை நிறுத்த வாசுதேவ நாணயக்கார முடிவு செய்திருந்தார். ஆனால், கடைசி நேரத்தில் வேட்பாளர் பட்டியலில் மாற்றம் செய்யப்பட்டு, அந்த இடத்துக்கு அமைச்சர் றிசாத் பதியுதீனின் அகில இலங்கை முஸ்லிம் காங்கிரஸ் வேட்பாளர் ஒருவருக்கு இடமளிக்கப்பட்டது. இது அமைச்சர் வாசுதேவ நாணயக்காரவுக்கு பலத்த ஏமாற்றத்தையும், அதிருப்தியையும் ஏற்படுத்தியுள்ளது. இதுகுறித்து அவர் தனது ஆழ்ந்த அதிருப்தியை ஐக்கிய மக்கள் சுதந்திர முன்னணியின் பொதுச்செயலர் சுசில் பிறேம் ஜெயந்தவிடம் தெரிவித்துள்ளார். மேலும் தமது வேட்பாளர் எதற்காக நீக்கப்பட்டார் என்று கேள்வி எழுப்பி, சிறிலங்கா ஜனாதிபதி மகிந்த ராஜபக்சவுக்கும் கடிதம் எழுதியுள்ளார். ஆனால் அதற்கு சிறிலங்கா ஜனாதிபதியிடம் இருந்து பதில் ஏதும் வரவில்லை என்றும் வாசுதேவ நாணயக்கார தெரிவித்துள்ளார். அரசு தனது கட்சியை முறையின்றி நடத்துவது சினங்கொள்ள வைக்கிறது என்றும் அவர் தெரிவித்துள்ளார்.

கதிர்காமரின் மகனின் காணியையும் அரசு பறித்துள்ளதாம்!

கதிர்காமர் 

முன்னாள் வெளிவிவகார அமைச்சர் லக்ஷ்மன் கதிர்காமரின் மகன் மேன்முறையீட்டு நீதிமன்றத்தில் மனுவொன்றை தாக்கல் செய்துள்ளார். ஆணை கோரும் மனுவொன்றையே அவர் தாக்கல் செய்துள்ளார். யாழ். மாவட்டத்திலுள்ள தமது பரம்பரைச்சொத்தை அரசாங்கம் பொறுப்பேற்பதற்கான முயற்சிகளை மேற்கொண்டுவருவதாகவே அவர் தனது மனுவில் குறிப்பிட்டுள்ளார்.
நகர அபிவிருத்தி அதிகாரசபையில் சுற்றுச்சூழல் வடிவமைப்பு ஆலோசகராக 1995 ஆம் ஆண்டு கடமையாற்றிய முறைப்பாட்டாளரான முன்னாள் வெளிவிவகார அமைச்சர் லக்ஷ்மன் கதிர்காமரின் மகன் எஸ்.ஜே. கிறிஸ்ரியன் கதிர்காமரே மனுவை தாக்கல் செய்துள்ளார்.
கடற்படையைச்சேர்ந்த அட்மிரல் ராஜநாதன் கதிர்காமர், இலங்கை இராணுவத்தின் மேஜர் செல்வநாதன் கதிர்காமநாதர், பிரபல இராணி சட்டத்தரணி சாம் கதிர்காமர் ஆகியோர் தனது நெருங்கிய உறவினர்கள் என்றும் கூறியுள்ளார். தனது மூதாதையர்வழி சொத்தான இந்த காணி, ஆழ்வார் மலையடி மாவிட்டபுரத்தில் உள்ளது எனவும் சுட்டிக்காட்டியுள்ளார்.
தனது நிலம் பொது தேவைக்காக தேவைப்படுவதாக காணி மற்றும் காணி அபிவிருத்தி அமைச்சர் அறிவித்தல் விடுத்துள்ளதாகவும் ஆனால், இதற்கான காரணம் பாதுகாப்பு படையணி தலைமையகம் அமைத்தல் என கூறப்பட்டுள்ளதாகவும் அவர் தனது மனுவில் தெரிவித்துள்ளார்.
யுத்தம் நிறைவடைந்த பின்னரும் பாதுகாப்பு படை 6381 ஏக்கர் காணிகளை பிடித்து வைத்திருப்பதாகவும் அந்த மனுவில் தெரிவிக்கப்பட்டுள்ளது. இந்த காணியை பொறுப்பேற்கும் அறிவித்தல்கள் உயர்பாதுகாப்பு வலயத்தினுள் வரவில்லை என்பதையும் அவர் தனது மனுவில் குறிப்பிட்டுள்ளார்.
தனது முதுசமான காணியை பிரதிவாதி பொறுப்பேற்பதை தடைச்செய்யும் தடையுத்தரவை ஒன்றை நீதிமன்றம் பிறப்பிக்கவேண்டுமென்றும் அவர் தனது மனுவில் கோரியுள்ளார்.

நன்றி:தினக்கதிர் 

வடக்கில் கோத்தாவிற்கு தடை!

வடக்கு மாகாணசபைத் தேர்தலில் சிறிலங்கா பாதுகாப்புச் செயலர் கோத்தபாய ராஜபக்சவின் உருவப்படத்தைப் பயன்படுத்த, சிறிலங்கா சுதந்திரக் கட்சி வேட்பாளர்களுக்குத் தடைவிதிக்கப்பட்டுள்ளது. சிறிலங்கா சுதந்திரக் கட்சியின் வேட்பாளராக அறிவிக்கப்படுவதற்கு முன்னரே, முஸ்லிம் வர்த்தகரான சிராஸ் யாழ்ப்பாணத்தில் கோத்தாபய ராஜபக்சவின் படத்துடன் பெருமளவு சுவரொட்டிகளை ஒட்டி பெரும் பரபரப்பை ஏற்படுத்தியிருந்தார். இந்த நிலையில், சுதந்திரக் கட்சியின் வேட்பாளர் பட்டியலில் அவரது பெயர் இடம்பெறவில்லை. இதையடுத்து, அவருக்கு ஆதரவானவர்கள் யாழ்.செயலகத்துக்கு முன்பாக, சிறிலங்கா சுதந்திரக் கட்சிக்கு எதிராக போராட்டம் நடத்தினர். இதன்பின்னர், அகில இலங்கை முஸ்லிம் காங்கிரசுக்கு வேட்பாளர் பட்டியலில் ஒதுக்கப்பட்ட இடம், சிராசுக்கு வழங்கப்பட்டது. இந்தநிலையிலேயே, கோத்தபாய ராஜபக்சவின் ஒளிப்படத்தைப் பயன்படுத்தியதால்தான், வேட்பாளர் பட்டியலில அவரைச் சேர்த்துக் கொள்வதில் இழுபறி ஏற்பட்டதாக ஐக்கிய மக்கள் சுதந்திர முன்னணியின் பொதுச்செயலர் சுசில் பிறேம் ஜெயந்த தெரிவித்துள்ளார். மேலும், கோத்தபாய ராஜபக்சவின் படத்தையோ, யாழ்.படைகளின் தளபதி மேஜர் ஜெனரல் மகிந்த ஹத்துருசிங்கவின் படத்தையோ தேர்தல் சுவரொட்டிகளில் பயன்படுத்தக் கூடாது என்றும் சிராசுக்கு எச்சரிக்கை விடுத்துள்ளார். அத்துடன், கோத்தபாய ராஜபக்சவின் படத்துடன் ஒட்டப்பட்ட சுவரொட்டிகளை உடனடியாக அகற்றுமாறும் வேட்பாளர் சிராசுக்கு, அமைச்சர் சுசில் பிறேம் ஜெயந்த உத்தரவிட்டுள்ளார்.

தேர்தலை புறக்கணிப்பதாக அறிவிப்பு!

கஜேந்திரகுமார் 

வடமாகாண சபைத் தேர்தல்!
எமது அன்பிற்கும் பெருமதிப்பிற்கும் உரிய தமிழ் மக்களே!
சிறீலங்கா அரசும் அதனுடைய சர்வதேச ஆதரவு சக்திகளும் தமிழ் அரசியலின் தேசியவாத சிந்தனையை இல்லாது ஒழித்து 13ம் திருத்தத்திற்குள்ளும் மாகாணசபை முறைக்குள்ளும் முடக்கும் நோக்கில் செயற்பட்டுக் கொண்டிருக்கும் இந்தத் தருணத்தில், தமிழ்த் தேசிய மக்கள் முன்னணி எதி;ர்வரும் வடமாகாண சபைத் தேர்தலை புறக்கணிப்பதான அறிவிப்பை இவ் அறிக்கை ஊடாக வெளிப்படுத்துகின்றது.
1987 ஆம் ஆண்டு தமிழ் மக்களின் தேசியப் பிரச்சினைகளுக்கான தீர்வு என்ற பெயரில் மாகாண சபைகள் உருவாக்கப்பட்டு எம்மீது திணிக்கப்பட்ட நாளில் இருந்து அதனை தமிழ் மக்கள் நிராகரித்து வந்துள்ளார்கள். காரணம் மாகாணசபைகள் தமிழ் மக்களின் அரசியல் அபிலாசைகளை துளியேனும் திருப்திப்படுத்தாதது மட்டுமல்ல, பேரெழுச்சி பெற்று நிற்கும் சிங்கள பௌத்த பேரினவாதத்தின் கொடூர கரங்களில் இருந்து எமது தேசத்தின் இருப்பை பாதுகாக்க எந்த வழியிலும் உதவப் போவதுமில்லை என்பதுமாகும்.
இலங்கைத் தீவின் வடக்கு-கிழக்கு மாகாணங்கள் தமிழ் மக்களின் தாயக பூமி என்பது எமது திண்மமான நிலைப்பாடு. தமிழர் தேசத்தை இருகூறிட்டு வடமாகாண சபைத் தேர்தலை நடாத்தி தமிழ் மக்களின் தேசிய அரசியலை வடமாகாணத்திற்குள் முடக்கிவிட சிங்களம் கங்கணம்கட்டி நிற்கின்றது.
எமது சம்மதமின்றி எம்மீது திணிக்கப்பட்ட ஓர் அரசியல் தீர்வை நாம் ஒருபோதும் ஏற்றுக் கொள்ளப்போவதுமில்லை, அதனைத் தொட்டுப்பார்க்கத் தாயராகவும் இல்லை. மாகாண சபை முறைக்கு அங்கீகாரம் வழங்குவதனை எத்தகைய காரணங்களினாலும் நியாயப்படுத்திவிட முடியாது என்பதே எமது உறுதியான நிலைப்பாடு. இது எமது தேசிய உரிமைப் போராட்டத்தின் ஆன்மாவை உலுக்கும் செயலாகவே நாம் பார்க்கின்றோம்.
அறிவிக்கப்பட்டுள்;ள மாகாணசபைத் தேர்தலின் புறச்சுழலை அவதனிக்கும்போது உரிமைக்கான எமது போரட்டம் பதவிக்கான போரட்டமாக மாற்றப்பட்டு விட்டதென்ற வேதனையான உண்மை எம்மை கலங்கவைகிறது. மேலதிகமாக, தமிழ்த் தேசிய அபிலாசைகளை பிரதிபலிக்கின்றோம் என்று கூறிக்கொண்டிருக்கும் தரப்புக்கள் இந்த மாகாண சபை முறைக்கு அங்கீகாரம் கொடுப்பதன் ஊடாக ஒரு இன அழிப்பில் இருந்து தமிழ்த் தேசத்தை காப்பாற்ற வேண்டும் என்ற இனப்பிரச்சினையின் பரிமாணத்தை மாற்றி மத்திய அரசுக்கும் மாநில அரசுக்கும் இடையில் இருக்கக் கூடிய ஓர் அதிகாரப் போட்டி என்ற புதிய வடிவத்தை கொடுப்பதற்கு துணைபோகின்றனர்.

எம் உறவுகளே…
வெளிசத்திகள் தத்தமது நலன்களை இத்தீவில் நிலைநிறுத்திக்கொள்வதற்காக இத்தேர்தலில் தமிழ் மக்களை முழுமையாகப்பங்கேற்க வைத்து மாகாணசபையை தீர்வாக ஏற்றுக்கொண்டுள்ளனர் எனக்காண்பிக்க முயல்கின்றன. அந்த யதர்த்தத்தினை உணர்ந்து தமிழ் மக்களின் நலன்களை மையமாக வைத்து இத்தேர்தலை தமிழ்த் தேசிய மக்கள் முன்னணி முழுமையாக புறக்கணித்து நிற்கின்றது. எமது ஆதரவு எந்த ஒரு கட்சிக்கோ, சுயேட்சைக் குழுவிற்கோ இல்லை. நாம் இத்தேர்தலில் தம்மை ஆதரிப்பதாக கூறுபவர்களிடத்தில் விழிப்பாக இருக்குமாறும் தயவாக வேண்டுகின்றோம்.
இத்தேர்தலில் பங்கெடுப்பதன் மூலம் மாகாண சபைகளைத் தமிழ்மக்கள் தீர்வாக ஏற்றுக்கொண்டுவிட்டார்கள் என யாரும் காட்ட முற்படின் அது 26 ஆண்டுகாலம் மாகாண சபைகளை நிராகரித்து நடைபெற்;ற உரிமைப் போராட்டத்தில் உயிர் நீர்த்த அனைத்து ஆன்மாக்களுக்கும் செய்யும் மன்னிக்க முடியாத துரோகமாகவே நாம் பார்க்கின்றோம். இத்தேர்தலில் பங்குபற்றுவதா? வாக்களிப்பதா? யாருக்கு வாக்களிப்பது? போன்ற தீர்மானங்களை நாம் ஒவ்வொரு தமிழ் மக்களின் மனச்சாட்சிக்கே விட்டுவிடுகின்றோம்.
கஜேந்திரகுமார் பொன்னம்பலம்
தலைவர்
செல்வராசா கஜேந்திரன்
பொதுச் செயலாளர்

வன்னி வரும் நவநீதம்பிள்ளை இரணைமடுவில் இறங்குவார்!

இலங்கைக்குப் பயணம் மேற்கொள்ளவுள்ள ஐ.நா மனித உரிமைகள் ஆணையாளர் நவநீதம்பிள்ளை, புலிகளால் இரணைமடுவில் அமைக்கப்பட்ட ஓடுபாதை வழியாகவே வன்னிக்கான பயணத்தை மேற்கொள்வார் என்று தெரியவருகிறது.ஐ.நா மனித உரிமைகள் ஆணையாளர் நவநீதம்பிள்ளை எதிர்வரும் ஓகஸ்ட் 25ஆம் திகதி முதல் 31ஆம் திகதி வரை இலங்கையில் உண்மையைக் கண்டறியும் பயணத்தை மேற்கொள்ளவுள்ளார்.இவரது பாதுகாப்பு மற்றும் பயண ஏற்பாடுகள் தொடர்பாக ஆராய,ஐ,நா மனித உரிமைகள் ஆணையாளரின் தலைமைப் பாதுகாப்பு ஆலோசகர் ஆப்ரஹாம் மதாய் தலைமையிலான குழுவொன்று கடந்த வாரம் இலங்கை வந்திருந்தது.நவநீதம்பிள்ளை தலைமையிலான குழுவினர், தனியார் விமானம் மூலமே, நாட்டின் பல்வேறு பகுதிகளுக்கும் பயணம் செய்வதற்கே ஐ.நா அதிகாரிகள் விருப்பம் கொண்டிருந்தனர்.ஆனால், இலங்கை அரசு தனது விமானப்படை விமானங்களில் பாதுகாப்பாகப் பயணத்தை மேற்கொள்ளலாம் என்று உத்தரவாதம் அளித்துள்ளது.இலங்கை விமானப்படையின் ஹெலி ருவர்ஸ் நிறுவனத்தின் விமானங்கள் அல்லது ஹெலிகளில் நாட்டின் எந்தப் பகுதிக்கும் பாதுகாப்பாகப் பயணம் மேற்கொள்ளலாம் என்று ஐ.நா அதிகாரிகளிடம், மூத்த பாதுகாப்பு அதிகாரிகள் உறுதியளித்துள்ளனர். நவநீதம்பிள்ளை தலைமையிலான குழுவினர், யாழ்ப்பாணம், கிளிநொச்சி,முல்லைத்தீவு, திருகோணமலை ஆகிய பகுதிகளுக்குச் சென்று பார்வையிடவுள்ளனர். இந்தக் குழுவினர், விடுதலைப் புலிகளால் அமைக்கப்பட்டு, இலங்கை விமானப்படையால் திருத்தியமைக்கப்பட்டு அண்மையில் திறந்து வைக்கப்பட்ட இரணைமடு ஓடுதளம் வழியாகவே பயணத்தை மேற்கொள்ளலாம் என்று எதிர்பார்க்கப்படுகிறது. நவநீதம்பிள்ளையின் பயணத்துக்கு ஐ.நா ஒற்றை இயந்திர விமானத்தையே தெரிவு செய்ததாகவும், ஆனால் இலங்கை விமானப்படை,இரட்டை இயந்திர விமானத்தை சேவையில் ஈடுபடுத்துவதாகவும் பாதுகாப்பு அமைச்சு கூறியுள்ளது.நவநீதம்பிள்ளையின் பயணத்துக்குத் தனியார் விமானத்தைப் பயன்படுத்தினாலும்,கட்டுநாயக்க மற்றும் மத்தல விமான நிலையங்கள் தவிர,நாட்டில் உள்ள ஏனைய அனைத்து விமான நிலையங்களும் இலங்கை விமானப்படையின் கட்டுப்பாட்டிலேயே உள்ளதால்,தனியார் விமானங்களும் அவற்றையே பயன்படுத்தியாக வேண்டும் என்றும் ஐ.நா அதிகாரிகளிடம் இலங்கை அரசு சுட்டிக்காட்டியுள்ளது.இலங்கை விமானப்படை விமானத்தில் நவநீதம்பிள்ளை குழுவினர் வடக்கு,கிழக்குப் பகுதிகளுக்கு அச்சமின்றிப் பயணம் செய்ய முடியும் என்று ஐ.நா அதிகாரிகளுக்கு உறுதியளிக்கப்பட்ட போதிலும், ஹெலி ருவர்ஸ் விமானங்களில் பயணிக்கும் யோசனையை ஐ.நா குழு நிராகரித்து விட்டது.இலங்கை விமானப்படை குடியியல் விமானப் போக்குவரத்து நெறிமுறைகளைக் கடைப்பிடித்தாலும்,அதில் பயணம் மேற்கொள்வது தவறான விம்பத்தைக் காட்டும் என்பதால்,ஐ,நா இந்த வாய்ப்பை விரும்பவில்லை என்று தகவல்கள் கூறுகின்றன.

தமிழரசுக் கட்சி வேட்புமனுத்தாக்கல்!

வடமாகாண சபைத் தேர்தலில் போட்டியிடுவதற்காக தமிழரசுக் கட்சி இன்று மதியம் 12 மணிக்கு யாழ் மாவட்ட செயலகத்தில் முதன்மை வேட்பாளர் சி.வி.விக்கினேஸ்வரன் தலைமையில் வேட்புமனுத் தாக்கல் செய்துள்ளது.
வடமாகாண சபைத் தேர்தலில் போட்டியிடுவதற்காக யாழ் மாவட்ட செயலகத்தில் வேட்பு மனுதாக்கல் செய்யும் மூன்றாவது கட்சி இது என்பது குறிப்பிடத்தக்கது.

கூட்டமைப்பின் சார்பில் வடக்கு தேர்தல் களத்தில் எழிலனின் மனைவி!

நடைபெறவுள்ள வடமாகாண சபை தேர்தலில் தமிழ் தேசியக்கூட்டமைப்பின் சார்பில் மூன்று பெண் வேட்பாளர்கள் களமிறக்கப்பட்டுள்ளனர். இம்மூவரில் இருவர் இன்று தமிழ் தேசியக்கூட்டமைப்பின் தலைவர் இரா.சம்பந்தன் தமிழரசுக்கட்சியின் பொதுச்செயலாளர் மாவை.சேனாதிராசா ஆகியோர் முன்னிலையில் தமிழரசுக்கட்சியின் யாழ் மாவட்ட தலைமைச்செயலகத்தில் கையொப்பமிட்டுள்ளனர். இதன்போது கூட்டமைப்பில் அங்கம் வகிக்கும் தமிழர் விடுதலைக்கூட்டணியின் செயலாளர் வீ.ஆனந்தசங்கரி ஈ.பி.ஆர்.எல்.எப் இன் செயலாளர் சுரேஸ் பிறேமச்சந்திரன் புளொட் அமைப்பின் தலைவர் சித்தார்த்தன் ரெலோ அமைப்பின் தலைவர் செல்வம் அடைக்கலநாதன் ஆகியோரும் பிரசன்னமாகியிருந்தனர்.
36 பேரைக்கொண்ட வடமாகாண சபைக்கு இலங்கை தமிழரசுக்கட்சியின் வீட்டுச்சின்னத்தில் 51 பேர் போட்டியிடுகின்றனர்.இதில் 48ஆண்களும் 03 பெண்களும் அடங்கியுள்ளனர். யாழ் மாவட்டத்தை பிரதிநிதித்துவப்படுத்தி விடுதலைப்புலிகள் அமைப்பின் முன்னாள் போராளி எழிலனின் மனைவி ஆனந்தியும் கிளிநொச்சி மாவட்டத்தை பிரதிநிதித்துவப்படுத்தி கிளி.கிராஞ்சி அ.த.க.பாடசாலை ஆசிரியை திருமதி வினுபானந்தகுமாரி கேதுரட்ணமும் முல்லைத்தீவு மாவட்டத்தை பிரதிநிதித்துவப்படுத்தி முல்லை.மந்துவில் அரசரட்ணம் வித்தியாலய உபஅதிபர் திருமதி மேரிகமலா குணசீலனும் போட்டியிடுகின்றனர்.
இன்று கையொப்பமிட்டுள்ள திருமதி வினுபானந்தகுமாரி கேதுரட்ணம்�� திருமதி மேரிகமலா குணசீலன் ஆகிய இரு பெண் வேட்பாளர்களுக்கும் கூட்டமைப்பில் அங்கம் வகிக்கும் கட்சிகளின் தலைவர்களும் சக ஆண் வேட்பாளர்களும் தமது வாழ்த்துகளையும்�� ஆசிகளையும் வழங்கியுள்ளனர்.
தமிழ் தேசியக்கூட்டமைப்பானது வேட்பாளர்கள் தெரிவில் மிகக்குறைந்தளவு பிரதிநிதித்துவத்தை பெண்களுக்கு கொடுத்திருப்பது கவனிக்கத்தக்கது.

விக்னேஸ்வரனை விமர்சிக்க பசிலுக்கு அருகதையில்லை – சம்பந்தன்

சம்பந்தன்-மகிந்த 

அம்பாந்தோட்டையைச் சேர்ந்த பசில் ராஜபக்ச கம்பகாவில் போட்டியிட முடியுமானால், விக்னேஸ்வரன் ஏன் யாழ்ப்பாணத்தில் போட்டியிட முடியாது என்று கேள்வி எழுப்பியுள்ளார் தமிழ்த் தேசியக் கூட்டமைப்பின் தலைவர் இரா.சம்பந்தன்.
தமிழ் மக்களால் நேசிக்கப்படும் தமிழ்த் தேசியக் கூட்டமைப்புக்கு முதன்மை வேட்பாளர் யார் என்பதை தீர்மானிக்கும் ஜனநாயக உரிமையும், சக்தியும் உள்ளது.
எமது வேட்பாளர் குறித்து குறை கூறுவதற்கு சிறிலங்கா அமைச்சர் பசில் ராஜபக்சவுக்கு எந்த அருகதையும் கிடையாது.
வடக்கு, கிழக்கு மக்களால் மிகவும் நேசிக்கப்படும் முன்னாள் நீதியரசர் விக்னேஸ்வரன், முதன்மை வேட்பாளராக நியமிக்கப்பட்டுள்ளதன் மூலம் தமிழ் மக்களுக்கு பெருமை சேர்க்கப்பட்டுள்ளதே தவிர, எந்தவித அவமானமும் ஏற்படவில்லை.
தமிழ் மக்கள் மத்தியில் இந்தவிதமான பிரதேசவாதங்கள் ஒருபோதும் பலிக்கப் போவதில்லை.
விக்னேஸ்வரனை நாம் வடக்கு மாகாணசபைக்கான முதன்மை வேட்பாளராக நிறுத்தியுள்ளது, பலரையும் அச்சமடையச் செய்துள்ளது.
விக்னேஸ்வரன் வடக்கு மாகாணத்தைப் பூர்வீகமாகக் கொண்டவர் தான்.
அவருக்கு சொந்தமான காணிகள், நிலங்கள் வடக்கு மாகாணத்தில் உள்ளன.
அத்துடன், வடக்கில் நீண்டகாலம் நீதிவானாகவும் பணியாற்றியுள்ளார்.
வடக்கு, கிழக்கு மக்களின் மொழி, கலை, கலாசார, பண்புகள் தொடர்பான மிகுந்த பற்றும், மரியாதையும் கொண்டவர்.
வடக்கு, கிழக்கு மக்களின் அபிலாசைகளை நன்கு உணர்ந்தவர்.
அனைவராலும் பொருத்தமான ஒருவர் என்று ஏற்றுக்கொள்ளப்பட்டவர். நீதிவழுவாத தீர்க்க தரிசனம் மிக்கவர்.
அத்தகைய ஒருவரை நாம் வடக்கு மாகாணசபையின் முதன்மை வேட்பாளராக நிறுத்தியுள்ளமை, வடபகுதி மக்களுக்கு மட்டுமன்றி, அனைத்துத் தமிழ் மக்களுக்கும் பெருமை சேர்ப்பதாகும்.
எமது தெரிவை விமர்சிக்க சிறிலங்கா அமைச்சர் பசில் ராஜபக்சவுக்கு எந்த உரிமையும் கிடையாது.
தமிழ் மக்கள் எப்போதும் தமிழ்த் தேசியக் கூட்டமைப்பின் பக்கமே இருக்கின்றனர்.
அதேபோன்று தமிழ் மக்களின் அபிலாசைகளை தமிழ்த் தேசியக் கூட்டமைப்பு நன்கு உணர்ந்து வைத்துள்ளது.
இன்றைய சூழ்நிலையில் விக்னேஸ்வரனை முதன்மை வேட்பாளராக நிறுத்தியதன் மூலம் அனைவரது கவனமும் தமிழ்த் தேசியக் கூட்டமைப்பின் பக்கம் திரும்பியுள்ளது” என்று தெரிவித்துள்ளார்.
முன்னதாக, வடக்கைச் சேர்ந்தவர் அல்லாத ஒருவரை வடக்கு மாகாணசபையின் முதன்மை வேட்பாளராகத் தமிழ்த் தேசியக் கூட்டமைப்பு தெரிவு செய்துள்ளதன் மூலம், வடக்கு மக்களை அவமானப்படுத்தி விட்டதாக, சிறிலங்கா அமைச்சர் பசில் ராஜபக்ச விமர்சித்திருந்தார் என்பது குறிப்பிடத்தக்கது.

இலங்கையர்கள் தப்பியோட்டம்!

இந்தோனேஷிய தடுப்பு முகாமொன்றிலிருந்து இலங்கைப் புகலிடக் கோரிக்கையாளர்கள் தப்பிச் சென்றுள்ளனர்.இந்தோனேஷியாவின் சுகாபுமி என்னும் தடுப்பு முகாமிலிருந்து இவ்வாறு இலங்கையர்கள் தப்பிச்சென்றுள்ளனர்.
மூன்று இலங்கையர்களும்,மூன்று ஈரானியர்களும் இவ்வாறு தப்பிச்சென்றுள்ளதாகத் தெரிவிக்கப்படுகிறது.குறித்த முகாமில் 66 புகலிடக் கோரிக்கையாளர்கள் தடுத்து வைக்கப்பட்டிருந்தனர்.தற்போது 60 புகலிடக்கோரிக்கையாளர்களே இந்த முகாமில் இருப்பதாகவும்,ஆறு பேர் தப்பிச்சென்றுள்ளதாகவும் முகாம் அதிகாரிகள் தெரிவித்துள்ளனர்.
யாருக்கும் தெரியாமல் எவ்வாறு குறித்த இலங்கை மற்றும் ஈரானிய புகலிடக் கோரிக்கையாளர்கள் தப்பிச் சென்றார்கள் என்பது புரியவில்லை என முகாம் பொறுப்பதிகாரிகள் தெரிவித்துள்ளனர்.காணாமல் போனவர்களை தேடும் பணிகள் முடுக்கி விடப்பட்டுள்ளதாகவும் இது தொடர்பில் விசாரணைகள் ஆரம்பிக்கப்பட்டுள்ளதாகவும் தெரிவிக்கப்படுகிறது.

சிறுவனின் மரணத்திற்கு அவுஸ்திரேலிய பிரதமர் இரங்கல்!

கெவின்  ரூட்

அண்மையில் இந்தோனேஷிய கடற்பரப்பில் இடம்பெற்ற படகு விபத்தில் உயிரிழந்த இலங்கைப் புகலிடக் கோரிக்கைச் சிறுவனின் தந்தைக்கு, அவுஸ்திரேலிய பிரதமர் கெவின் ரொட் இரங்கல் தெரிவித்துள்ளார். மூன்று வயதான பர்மிதன் பாலமனாறன் என்ற சிறுவனே சம்பவத்தில் உயிரிழந்துள்ளார். இந்த படகில் 150க்கும் மேற்பட்டவர்கள் பயணித்துள்ளதாகவும், படகு விபத்தில் 13க்கும் மேற்பட்டவர்கள் உயிரிழந்ததாகவும் தெரிவிக்கப்படுகிறது.
சிறுவனின் தந்தைக்கு பிரதமர் ரொட், தொலைபேசி மூலம் தனது இரங்கலை வெளியிட்டுள்ளார். பர்மிதனின் தந்தையான நாகராசா கடந்த சில ஆண்டுகளாக அவுஸ்திரேலியாவில் தங்கியிருக்கின்றார் என்பது குறிப்பிடத்தக்கது. அவரது மனைவியும் பிள்ளையும் குடு;ம்ப வீசா கிடைக்காத காரணத்தினால் இலங்கையில் தங்கியிருந்தனர். நாகராசா பேர்த்தில் உள்ள தொழிச்சாலையொன்றில் பணியாற்றுகின்றார் என்பது குறிப்பிடத்தக்கது.

பின்வாங்கிய முஸ்லிம் காங்கிரஸ்!

13வது திருத்தச்சட்டத்தைப் பலவீனப்படுத்தும் திருத்தங்களை மேற்கொள்வதற்கு எதிர்ப்புத் தெரிவிக்கும் தீர்மானம் ஒன்றை, கிழக்கு மாகாணசபையில் சமர்ப்பித்த சிறிலங்கா முஸ்லிம் காங்கிரஸ், கடைசி நேரத்தில் பின்வாங்கியுள்ளது.
சிறிலங்கா முஸ்லிம் காங்கிரஸ் சமர்ப்பித்திருந்த தீர்மானம் கிழக்கு மாகாணசபையில் நேற்று விவாதிக்கப்படவிருந்த நிலையிலேயே, சிறிலங்கா முஸ்லிம் காங்கிரஸ் அதனை மீளப்பெற்றுக் கொண்டுள்ளது.
இதனால், இந்தத் தீர்மானத்தை ஆதரித்து வாக்களிக்கக் காத்திருந்த, தமிழ்த் தேசியக் கூட்டமைப்பின் உறுப்பினர்கள் 11 பேர் உள்ளிட்ட 13 எதிரணி உறுப்பினர்களும் ஏமாற்றத்துடன் சபையில் இருந்து வெளியேறினர்.
இதுகுறித்து கருத்து வெளியிட்ட குழுக்களின் தலைவர் ஏ.எம். ஜமீல், இந்த தீர்மானம் குறித்து விவாதம் நிகழ்ச்சி நிரலில் சேர்க்கப்பட்டிருந்த போதிலும், தற்போது அதனை முன்னெடுப்பதில்லை என்று கட்சித் தலைவர்கள் தீர்மானித்துள்ளதாக தெரிவித்தார்.
சிறிலங்கா அரசாங்கம் 13வது திருத்தச்சட்டத்தை திருத்தும் முடிவை பிற்போட்டுள்ளதால், பொருத்தமான நேரத்தில் இந்த தீர்மானம் கொண்டு வரப்படும் என்றும் அவர் கூறியுள்ளார்.

தமிழ் மொழியை புறக்கணிக்கும் மாணவர்கள்:தமிழக அரசு தடுத்து நிறுத்த வேண்டும்!

மாணவர்கள் மதிப்பெண் கூடுதலாகப் பெற தமிழ் மொழியல்லாத பிற மொழிகளை தேர்வு செய்யும் போக்கினை தமிழக அரசு தடுத்திட வேண்டும் என்று நாம் தமிழர் கட்சி கோரிக்கை விடுத்துள்ளது.
இது குறித்து வெளியிட்டுள்ள அறிக்கையில் கூறியிருப்பதாவது:
தமிழ்நாட்டில் மேனிலைப் பள்ளிகளில் (பிளஸ் 2) இரண்டாவது மொழிப் பாடமான தமிழை புறக்கணித்துவிட்டு பிரெஞ்ச், ஜெர்மன், சமஸ்கிருதம் போன்ற மொழிகளை தேர்வு செய்து படிக்கும் நிலை ஒவ்வொரு ஆண்டும் அதிகரித்து வருகிறது.

தமிழ்நாட்டில், குறிப்பாக சென்னை, கோவை உள்ளிட்ட பெரு நகரங்களில் உள்ள அரசு உதவி பெறும் தனியார் பள்ளிகளில் இப்படி தமிழ் மொழியை படிப்பதை தவிர்ப்பது திட்டமிட்டு செய்யப்பட்டு வருகிறது. தமிழ்நாட்டின் பள்ளி பாடத் திட்டத்தில் முதல் மொழியாக ஆங்கிலமும், இரண்டாவது மொழிப் பாடமாக தமிழும் இருந்து வருகிறது. தமிழ் மொழியில் அதிக மதிப்பெண் பெற முடியாது என்கிற காரணத்தைக் காட்டி, தமிழுக்கு பதிலாக சமஸ்கிருதம், பிரஞ்ச், ஜெர்மன் ஆகிய ஏதாவது ஒரு அந்நிய மொழியை தேர்வு செய்து படித்துவிட்டு தேர்வு எழுதுகிறார்கள். மெட்ரிக்குலோஷன் பாடத்திட்டம் கடைபிடிக்கப்படும் பள்ளிகளில் இரண்டாவது மொழிப் பாடமாக இருக்கும் தமிழுக்கு பதிலாக அயல் மொழிகளை படித்து தேர்வு எழுதுவது ஊக்குவிக்கப்படுகிறது.
சமஸ்கிருதம், பிரெஞ்ச், ஜெர்மனி போன்ற மொழிகள் படிக்கும்போது, அதற்கான பாடத் திட்டம் மிக எளியதாக (எலிமெண்ட்ரி லெவல்) தயாரிக்கப்பட்டுள்ளதால், அரசு நடத்தும் மேனிலைத் தேர்வில் அதிக மதிப்பெண்களை - அதாவது 200க்கு 199 என்றெல்லாம் பெறுவது - சுலபமானது என்பதனால் பல மாணாக்கர்கள் இப்படி அயல் மொழியை தேர்வு செய்து படிக்கிறார்கள். ஆனால் பிளஸ் 2 வகுப்பிற்கான தமிழ் மொழி பாடத் திட்டம் உயர்ந்த நிலையில் தயாரிக்கப்பட்டுள்ளதால், அதில் தங்களால் 200க்கு 160 மதிப்பெண் கூட பெற முடியாது என்று அந்த மாணவர்களும் கருதுகின்றனர். தமிழ் மொழி தொடக்கப்பள்ளியில் இருந்து கற்றுவரும் மாணவர்களுக்கு தமிழக அரசு பாடத் திட்டம் எந்த விதத்திலும் கடினமானதாக இல்லை. ஆனால், பிற மாநிலங்களில் சென்று தங்களை பட்டப் படிப்பை தொடர நினைக்கும் நகர வாழ், மேல் தட்டு வீட்டுப் பிள்ளைகள் அயல் மொழிப் பாடங்களை எடுத்து அதிக மதிப்பெண் பெற இப்படியான ஒரு வழியை கடைபிடிக்கிறார்கள்.
இப்படி ஒரு நிலையை தமிழக அரசு தடுத்து நிறுத்தாவிட்டால், நாளையடைவில், தமிழ் மொழியை படித்து தேர்வு எழுதும் மாணவர்கள் எண்ணிக்கை குறைந்து, தமிழ் மண்ணிலேயே தமிழ் மொழி புறக்கணிக்கப்படும் சூழல் உருவாகும் . எனவே, இதில் தமிழக அரசு உடனடியாக தலையிட்டு தமிழை புறக்கணிக்கும் நிலையை தடுத்திட வேண்டும்.இவ்வாறு தெரிவிக்கப்பட்டுள்ளது.

யாழ்,சிறுமியின் வாழ்வை சிதைத்த சிங்களன்!

யாழ்ப்பாணம் கைதடி சிறுவர் இல்லத்திலிருந்து தப்பியோடிய மூவரில் சிறுமி ஒருவர் களனியில் வீடொன்றில் வேலைக்காரியாக இருந்த நிலையில் மீட்கப்பட்டுள்ளதாக சாவகச்சேரி பொலிஸார் தெரிவித்தனர்.
15 வயதான குறித்த சிறுமி அந்த வீட்டில் வேலைக்கு அமர்த்தப்படுவதற்கு முன்னர் பாலியல் வல்லுறவிற்கு உட்படுத்தப்பட்டு உள்ளதாகவும் தெரிவிக்கப்படுகின்றது.
பிலியந்தலை பிரதேசத்திலுள்ள இளைஞர் ஒருவர் இந்த சிறுமியை ஹோட்டலுக்கு அழைத்து சென்று துஷ்பிரயோகத்திற்கு உட்படுத்தியதன் பின்னர் வீட்டுவேலைக்காக களனியிலுள்ள பெண்ணொருவரிடம் ஒப்படைத்துள்ளதாக ஆரம்பக்கட்ட விசாரணைகளிலிருந்து தெரியவருகின்றது.
வீட்டு ஏஜமானி குறித்த சிறுமியிடம் தகவல்களை பெற்று கிளிநொச்சியிலுள்ள சிறுமியின் தந்தைக்கு இதுதொடர்பில் அறிவித்துள்ளார்.
தந்தையின் கோரிக்கைக்கு அமைவாக இந்த சிறுமியை எஜமானி உறவினர்களிடம் ஒப்படைத்துள்ளார் என்றும் தெரிவிக்கப்படுகின்றது.
கிளிநொச்சியை சேர்ந்த குறித்த சிறுமி ஏற்கனவே துஷ்பிரயோகத்திற்கு உட்படுத்தப்பட்டிருந்த நிலையில் தடுப்புகாவல் உத்தரவிற்கு அமைய கைதடி சிறுவர் இல்லத்தில் ஒப்படைக்கப்பட்டிருந்தார்.
அங்கிருந்து 21 மற்றும் 22 வயது பெண்களுடன் இந்த சிறுமி மே மாதம் 24 ஆம் திகதி தப்பியோடியுள்ளார். அவர்கள் மூவரும் கொழும்பை நோக்கி பஸ்ஸில் வந்துக்கொண்டிருந்தபோது அதிலொரு யுவதி பஸ்ஸில் பயணித்துக் கொண்டிருந்த சிங்களவரான ஆணொருவருடன் தொடர்பினை ஏற்படுத்தியுள்ளார்.
அவரின் கோரிக்கைக்கு அமைய மூவரும் பிலியந்தலைக்கு சென்று ஹோட்டலில் தங்கியதாகவும் தெரிவிக்கப்படுகின்றது.
இந்நிலையில், சிறுமியை மட்டும் அங்கிருந்த இளைஞரிடம் கைவிட்டுவிட்டு இரண்டு யுவதிகளும் அங்கிருந்து தப்பி சென்றுவிட்டதாக தெரிவிக்கப்படுகின்றது.
சிறுமியை சில நாட்கள் ஹோட்டலில் வைத்து துஸ்பிரயோகத்திற்கு உட்படுத்திய இளைஞன், அதற்கு பின்னர் களனியிலுள்ள பெண்ணொருவரிடம் சிறுமியை வீட்டுவேலைக்காக ஒப்படைத்ததாக தெரிவிக்கப்படுகின்றது.

பூரியின் நியமனத்தை நிராகரித்தது சிறிலங்கா!

சிறிலங்காவுக்கான சிறப்புத் தூதுவர் ஒருவரை நியமிக்கும் இந்தியாவின் திட்டத்துக்கு சிறிலங்கா அரசாங்கம் எதிர்ப்புத் தெரிவித்துள்ளதாக கொழும்பு ஆங்கில ஊடகம் ஒன்று தகவல் வெளியிட்டுள்ளது.
புதுடெல்லிக்குக் கொடுத்த வாக்குறுதியை மீறி 13வது திருத்தச்சட்டத்தை நீர்த்துப் போகச் செய்யும் சிறிலங்கா அரசாங்கத்தின் நகர்வுகளை அடுத்து, இந்தியாவின் மூத்த இராஜதந்திரியான ஹர்தீப்சிங் பூரியை சிறிலங்காவுக்கான சிறப்புத் தூதுவராக நியமிப்பது குறித்து ஆராய்ந்து வருவதாக தகவல்கள் வெளியாகியிருந்தன.
இந்தநிலையில், சிறப்புத் தூதுவர் ஒருவரை நியமிப்பதற்கு சிறிலங்கா அரசாங்கம் அதிகாரபூர்வமான எதிர்ப்பை வெளியிட்டுள்ளது.
கடந்தவாரம் புதுடெல்லியில் உள்ள சிறிலங்கா தூதுவர் பிரசாத் காரியவசம், இந்திய வெளிவிவகார அமைச்சு பணியகமான சவுத் புளொக்கிற்குச் சென்று பேச்சு நடத்தியுள்ளார்.
இதன்போதே, இருதரப்பு விவகாரங்களைக் கையாள்வதற்கு சிறப்புத் தூதுவர் ஒருவரை நியமிக்கும் இந்தியாவின் திட்டத்துக்கு சிறிலங்கா அரசின் கடுமையான எதிர்ப்பை பிரசாத் காரியவசம் வெளிப்படுத்தியுள்ளார் என்றும் கொழும்பு ஆங்கில ஊடகம் தகவல் வெளியிட்டுள்ளது.

தன்னார்வ தொண்டர் கைதிற்கு ஜெர்மனி எதிர்ப்பு!

தமது நாட்டு தன்னார்வ தொண்டர் கைது செய்யப்பட்டமைக்கு ஜெர்மனிய அரசாங்கம் கடும் எதிர்ப்பை வெளியிட்டுள்ளது. இலங்கையில் 30 ஆண்டுகளாக இயங்கி வந்த முன்னணி தன்னார்வ தொண்டு நிறுவனமொன்றின் தலைவர் இவ்வாறு கைது செய்யப்பட்டிருந்தார்.
பிரிட்டிரிச் ஏபர்ட் அமைப்பின் இலங்கைக் கிளைப் பொறுப்பாளர் நோரா லங்கன்பார்சரே இவ்வாறு கைது செய்யப்பட்டார். கடந்த 13ம் திகதி இலங்கை வெளிவிவகார அமைச்சர் ஜீ.எல்.பீரிஸ் ஜெர்மனியின் பேர்ளின் நகரில், அந்நாட்டு வெளிவிவகார அமைச்சர் குய்டோ வெஸ்டர்வெல்லை சந்தித்து பேச்சுவார்த்தை நடத்தியிருந்தார். அதே தினத்தில் நோராவை இலங்கை அதிகாரிகள் கைது செய்திருந்தனர். இந்த சம்பவத்திற்கு ஜெர்மனிய வெளிவிவகார அமைச்சர் கடும் எதிர்ப்பை வெளியிட்டுள்ளார்.
குறித்த தன்னார்வ தொண்டு நிறுவனம் தனது பணிகளை தடையின்றி மேற்கொள்ள இலங்கை அரசாங்கம் அனுமதியளிக்க வேண்டுமென அவர் வலியுறுத்தியுள்ளார். இந்த கைதினைத் தொடர்ந்து குறித்த தன்னார்வ தொண்டு நிறுவனத்தின் பணிகள் தற்காலிகமாக இடைநிறுத்தப்பட்டுள்ளது. பணியாளர்களின் பாதுகாப்பை கருத்திற் கொண்டு இந்தத் தீர்மானம் எடுக்கப்பட்டுள்ளது.
நிலுவையில் உள்ள வழக்கு ஒன்று தொடர்பிலேயே குறித்த அதிகாரி கைது செய்யப்பட்டதாக இலங்கை வெளிவிவகார அமைச்சு அறிவித்துள்ளது. குறித்த தன்னார்வ தொண்டு நிறுவனத்தின் பொறுப்பதிகாரி 200 மில்லியன் சொத்துக்களைப் பிணையாக வைத்து அண்மையில் நாட்டை விட்டு வெளியேறிச் சென்றுள்ளார்

.

குன்னூரில் இராணுவப் பயிற்சிக் கல்லூரி முற்றுகை-வைகோ

வைகோ 

சிங்கள இராணுவத்தினருக்கு குன்னூர் வெலிங்டனில் பயிற்சியைத் தொடரும் இந்திய அரசின் துரோகம்!
ஜூன் 25 செவ்வாய்கிழமை குன்னூரில் இராணுவப் பயிற்சிக் கல்லூரி முற்றுகை.
இது தொடர்பாக மதிமுக பொதுச் செயலாளர் வைகோ அறிவித்துள்ள அறிக்கையில் கூறியுள்ளதாவது:
தமிழ் இனத்தையே இலங்கைத் தீவில் பூண்டோடு அழிக்க திட்டமிட்டு சிங்களப் பேரினவாத அரசு நடத்திய கோரமான இனப்படுகொலைக்கு அனைத்து விதத்திலும் உடந்தையாக இருந்து செயல்பட்ட காங்கிரஸ் தலைமை தாங்கும் மத்திய அரசு, தாய்த் தமிழகத்துத் தமிழ் மக்கள் நெஞ்சில் ஓங்கி மிதிப்பதுபோல், சிங்கள இராணுவத்தினருக்கு தமிழ்நாட்டில் திரும்பத் திரும்ப அழைத்துக்கொண்டுவந்து பயிற்சி கொடுக்கிறது. கோடிக்கணக்கான தமிழர்களின் நெஞ்சில் நெருப்பு மூண்டதை மத்திய அரசு துச்சமாகக் கருதுகிறது. தமிழர்களின் தன்மானத்தை வேண்டுமென்றே சீண்டிப் பார்க்கிறது.
தமிழக அரசும், தமிழ் நாட்டில் மான உணர்வுள்ள அரசியல் கட்சிகளும், தமிழ் உணர்வாளர்களும் மத்திய அரசின் இந்தத் துரோகச் செயலுக்குப் பலத்த எதிர்ப்பையும், கண்டனத்தையும் தெரிவித்ததையும் காங்கிரஸ் அரசு பொருட்படுத்தவே இல்லை. கடந்த மே 27 ஆம் தேதியில் இருந்து சிங்கள இராணுவத்தின் விங் கமாண்டர் தசநாயகே, மேஜர் ஹரிச்சந்திரா ஆகியோர் பயிற்சியைத் தொடருவது மட்டுமல்ல; அக்கொடியோருக்கு நீலகிரி மாவட்டத்தில் இன்பச் சுற்றுலாவையும் நடத்தி இருக்கிறது.
ஒரு பக்கத்தில் தமிழக மீனவர்களை இலங்கைக் கடற்படை நாளும் தாக்குவதும், சிறை பிடிப்பதும் தொடர்கிறது. நாதியற்றுப் போய்விடவில்லை தமிழ் இனம்; மானமும் வீரமும் அழிந்து விடவில்லை என்பதை மத்திய அரசுக்கு உணர்த்த வேண்டியது நமது தலையாயக் கடமையாகும்.
எனவே, 25 ஆம் தேதி செவ்வாய் கிழமை காலை 11 மணிக்கு குன்னூர் வெலிங்டன் இராணுவப் பயிற்சிக் கல்லூரியை முற்றுகையிடுவோம். மத்திய அரசுக்கு எச்சரிக்கை விடுப்போம். இதனை வலியுறுத்தி ஏற்கனவே அறப்போர் நடத்திய தமிழ் ஈழ உரிமைப் போராட்ட அமைப்புகள், அரசியல் கட்சிகள், ஈழத் தமிழ் உணர்வு அமைப்புகள் ஆகியவற்றின் தோழர்களும், ஈழத் தமிழர்களைக் காக்க பல்வேறு களங்களில் போராடி வருகிற அமைப்புகளின் தோழர்களும், மாணவக் கண்மணிகளும் தமிழகத்தின் நாலா திசைகளில் இருந்தும் அணி திரண்டு வாரீர்! நானும் உங்களோடு பங்கேற்கிறேன்.
இந்திய அரசின் துரோகத்துக்கும், ஆணவத் திமிருக்கும் பாடம் புகட்ட, தமிழகத்தை ஆயத்தப்படுத்த இந்த அறப்போர் களத்தில் அணிதிரள்வோம் என வைகோ அழைப்பு விடுத்துள்ளார்.

சிவராமை கடத்தியவர்களை அடையாளம் காட்ட முடியும்!

தராகி சிவராம் 

கொலை செய்யப்பட்ட ஊடகவியலாளரான தர்மரட்ணம் சிவராமைக் கடத்திய நபர்களை தன்னால் அடையாளம் காட்ட முடியும் என ஆட்டோ ஓட்டுனர் ஒருவர் நீதிமன்றத்தில் சாட்சியமளித்துள்ளார்.
கொழும்பு மேல் நீதிமன்றத்தில் சிவராம் கொலை வழக்கு விசாரணைக்கு எடுக்கப்பட்டபோது, அங்கு சாட்சியமளித்த கொழும்பு பாமன்கடை பகுதியைச் சேர்ந்த ரஞ்சன் பிரியந்த என்னும் ஆட்டோ ஓட்டுனரே இவ்வாறு கூறியுள்ளார்.
சிவராம் கடத்தப்பட்ட போது தான் பம்பலப்பிட்டி பொலிஸ் நிலையத்துக்கு அருகே தனது வண்டியுடன் நின்றிருந்ததாகக் அவர் கூறினார்.
சாம்பல் நிற
ஜீப்பில் வந்த ஒரு குழுவே சிவராமைக் கடத்தியதாகவும், அவர்களை தான் தெளிவாகப் பார்த்ததாகவும், அவர்களை அடையாளம் காட்ட தன்னால் முடியும் என்றும் அவர் கூறியுள்ளார்.
வழக்கு விசாரணை ஆகஸ்டு மாதம் 22ஆம் திகதிக்கு ஒத்திவைக்கப்பட்டது.
இந்த வழக்கு குறித்த சந்தேக நபரான ஆறுமுகம் சிறிஸ்கந்தராஜா என்னும் புளொட் அமைப்பின் அங்கத்தவர் தற்போது பிணையில் விடுதலை செய்யப்பட்டுள்ளார்.

பெரும் பதற்றம்- ஆயுதம் தாங்கிய ராணுவம் குவிப்பு!

கிழக்கு மாகாணம், திருகோணமலை மாவட்டத்தில் முஸ்லிம்கள் அதிகளவில் செறிந்து வாழும் கிண்ணியாவில் பொதுமக்கள் மற்றும் பொலிசார் இடையே ஏற்பட்ட மோதல் ஏற்பட்டுள்ளது. இதனையடுத்து தற்போது அங்கு கடும் பதற்றமான சூழல் ஏற்பட்டுள்ளது.
விறகு சேகரிக்கச் செல்லும் வண்டில்காரர்களிடம் அனுமதிப்பத்திரம் தொடர்பில் பொலிசார் வாக்குவாதப்பட்டுள்ளனர். அதனையடுத்து கடும் கோபம் கொண்ட பொலிசார் பொதுமக்களின் ஏராளமான வாகனங்களை அடித்து சேதப்படுத்தியுள்ளனர். இதனையடுத்து பொலிசார் பொதுமக்கள் இடையில் கடும் முறுகல் ஏற்பட்டுள்ளது.
இந்நிலையில் பதட்டத்தைத் தணித்து நிலைமையைக் கட்டுப்பாட்டுக்குள் கொண்டு வரும் முயற்சியில் பிரதேச இஸ்லாமிய மார்க்க அறிஞர்கள் ஈடுபட்டுள்ளனர். எனினும் அங்கு நிலவும் பதற்றமான சூழ்நிலையைக் கருத்திற் கொண்டு ஆயுதம் தாங்கிய ராணுவத்தினர் அங்கு பெருமளவில் குவிக்கப்பட்டுள்ளனர்.

ஆனந்தசங்கரிக்கு ஞானம் பிறந்தது!

ஆனந்தசங்கரி 

சமஷ்டியைக் கைவிட்டு ஒற்றை ஆட்சி அடிப்படையில் ஒரு அரசியல் சாசனத்தை உருவாக்குவதாக ஐக்கிய தேசியக் கட்சி கூறியுள்ளது. இதனை தமிழ்த் தேசியக் கூட்டமைப்பு ஏற்றுக்கொள்வது என்பது படுபாதகச் செயலாகும்.
இவ்வாறு தெரிவித்துள்ளார், தமிழர் விடுதலைக் கூட்டணியின் செயலாளர் நாயகம் வீ. ஆனந்தசங்கரி. இது தொடர்பில் அவர் விடுத்துள்ள அறிக்கையில் மேலும் தெரிவிக் கப்பட்டிருப்பதாவது, ஐக்கிய தேசியக் கட்சி 2005 ஆம் ஆண்டு ஜனாதிபதித் தேர்தலில் சமஷ் டிக் கொள்கையை முன் வைத்தே போட்டியிட்டது. 49 சதவீத மக்களின் ஆதரவு கிடைத்தது.
தந்தை செல்வாவும் இனப்பிரச் சினைக்குத் தீர்வாகச் சமஷ்டியையே முன் வைத்திருந்தார். இவ்வாறானதொரு நிலையில் ஐ.தே.க சமஷ்டிக் கொள்கையைக் கைவிட்டு ஒற்றை ஆட்சி அடிப்படையில் அரசியல் சாசனத்தை உருவாக்குவதாக கூறியுள்ளது.
இதனைத் தமிழ்த் தேசியக் கூட்டமைப்பின் நாடாளுமன்ற உறுப்பினர் எம்.ஏ. சுமந்திரன் பாராட்டியிருப்பது பல்லாயிரக்கணக்கான உயிர்களையும் கோடி பெறுமதியான சொத்துக்களையும் இழந்த தமிழ் மக்களுக்குச் செய்யும் படுபாதகச் செயலாகும்.
தமிழ் மக்கள் ஏற்றுக்கொள்ளாத அறிக்கைகளை விடும் சுமந்திரன் பதவி விலக வேண்டும். அல்லது தமிழ்த்தேசிய கூட்டமைப்பு அவரைப் பதவி விலக்க வேண்டும் என்றுள்ளது.

மனைவி கொலையல்லாத மரணம்; கணவனுக்கு 6 வருடங்கள் சிறை!

மனைவிக்குக் கொலை அல்லாத மரணம் விளைவித்த குற்றத்துக்காக அவரது கணவனுக்கு 6 வருடங்கள் கடூழியச் சிறைத் தண்டனை விதித்துத் தீர்ப்பளித்தது யாழ்.மேல் நீதிமன்றம்.
இந்த வழக்கு தீர்ப்புக்காக யாழ்.மேல் நீதிமன்றில் ஆணையாளர் ஜெ.விஸ்வநாதன் முன்னிலையில் நேற்று எடுத்துக்கொள் ளப்பட்டது.
கிளிநொச்சி உதயநகர் மேற்கைச் சேர்ந்த இலட்சுமணன் அமிர்த கௌரி (வயது65) என்பவர் கத்தியால் குத்தப்பட்டு 2010ஆம் ஆண்டு பெப்ரவரி 12ஆம் திகதி உயிரிழந்தார்.
சந்தேகத்தின் பேரில் அவரது கணவனான பே.இலட்சுமணன் பொலிஸாரால் கைது செய்யப்பட்டு கிளிநொச்சி நீதிமன்றினால் விளக்கமறியலில் வைக்கப்பட்டார்.
அவர் தொடர்பான வழக்கு சட்டமா அதிபர் திணைக்களத்தினால் 2012ஆம் ஆண்டு மே 23ஆம் திகதி யாழ்.மேல் நீதிமன்றில் தாக்கல் செய்யப்பட்டது. வழக்கு விசாரணையின்போது அவர்களின் மகனான அமரேசன் மேல்நீதிமன்றில் சாட்சியமளித்திருந்தார்.
அவர் தனது சாட்சியத்தில்,
"கிணற்றடியில் அம்மா கத்தும் சத்தம் கேட்டது. நான் அங்கு சென்றபோது அப்பா அருகிலுள்ள காணிக்குள் ஓடிச்சென்றார். அவரைத் துரத்திச் சென்று அடித்தேன்' என்று கூறினார். அவர்களின் மகளான மகேஸ்வரி சாட்சியமளிக்கையில்,
"அம்மா அண்ணாவின் மடியில் தலை வைத்திருந்தார். பிள்ளைகளைக் கவனமாகப் பார்த்துக்கொள். நான் தப்பமாட்டேன். அப்பா என்னைக் கத்தியால் குத்திவிட்டார்' என்று கூறினார்.
சான்றுப் பொருளான கத்தி பொலிஸாரால் மீட்கப்பட்டிருந்தது. உடற்கூற்றுப் பரிசோதனையை மேற்கொண்ட யாழ்.போதனா வைத்தியசாலை சட்ட வைத்திய அதிகாரியும் சாட்சியமளித்திருந்தார்.
மேல் நீதிமன்றில் எதிரியான இலட்சுமணன் வாக்குமூலம் அளிக்கையில், "எனக்கும் மனைவிக்கும் இடையில் சண்டை ஏற்பட்டது. நான் சீவல் தொழில் செய்வதால் எப்பொழுதும் கத்தியை என்னுடன் வைத்திருப்பேன், மனைவியை வேண்டு மென்று குத்தவில்லை என்றும், மனைவி வேறுநபருடன் தொடர்பு வைத்திருந்தார் என்றும் கூறினார்.
இவற்றை வைத்துப் பார்க்கும்போது அவர் கொலை செய்யும் நோக்கில் இதனைச் செய்யவில்லை என்பதை அவதானிக்க முடிகிறது. எதிரிக்கு எதிரான குற்றம் கொலையல்லாத மரணம் விளைவித்த குற்றமாகக் குறைக்கப்படுகின்றது.
அவருக்கு 6 வருடங்கள் கடூழியச் சிறைத் தண்டனையும் 10 ஆயிரம் ரூபா குற்றப்பணமும் விதிக்கப்படுகிறது. குற்றப்பணம் செலுத்தத் தவறின் 3 மாதங்கள் சிறைத்தண்டனை அனுபவிக்க வேண்டும் என்றும் நீதி மன்றம் தீர்ப்பளித்தது.

அமெரிக்கா என்னதான் சொல்ல முனைகிறது?

தமிழீழ விடுதலைப் புலிகளின் சர்வதேச வலையமைப்பு தொடர்ந்தும் இயங்கி வருவதாக அமெரிக்கா தெரிவித்துள்ளது. புலிகளுக்கு ஆதரவானவர்களின் சர்வதேச நவடிக்கைகள் மற்றும் நிதிக் கொடுக்கல் வாங்கல்கள் தொடர்ந்தும் இடம்பெற்று வருவதாகவும் அமெரிக்கா குறிப்பிட்டுள்ளது.
அமெரிக்க ராஜாங்கத் திணைக்களத்தினால் வெளியிடப்பட்டுள்ள அறிக்கையொன்றில் இவ்வாறு தெரிவிக்கப்பட்டுள்ளது.2012ம் ஆண்டில் சட்டவிரோத ஆட்கடத்தல் நடவடிக்கைகளில் புலிகளுக்கு தொடர்பு இருப்பதாகவும்
தன்னார்வ தொண்டு நிறுவனங்களின் ஊடாக நிதி திரட்டும் நடவடிக்கைகள் தொடர்ந்தும் முன்னெடுக்கப்பட்டு வருவதாகவும் மேலும் குறிப்பிட்டுள்ளது.